سپریم کورٹ بار کےعہدیدران ریاست علی گوندل اور صدراحسن بھون آمنے سامنے

اسلام آباد (قاری عاشق حسین سے ) – ضمنی الیکشن میں تحریک انصاف کی کامیابی پر سپریم کورٹ بار ایسوسی ایشن کے عہدیدار ایک دوسرے کے سامنے آگئے۔ ایڈیشنل سیکرٹری نے نتائج کو خوش آئند قرار دیا تو بار کے صدر نے بیان سے اظہار لاتعلقی کردیا۔

سپریم کورٹ بار ایسوسی ایشن کے ایڈیشنل سیکرٹری ریاست علی گوندل اورسپریم کورٹ کے صدر احسن بھون ضمنی انتخابات پر آمنے سامنے۔

سپریم کورٹ بار ایسوسی ایشن کے ایڈیشنل سیکرٹری ریاست علی گوندل نے کہا ہے کہ عوام کا فیصلہ ہی کسی بھی حکومت کی قانونی بنیاد ہوتی ہے۔ ضمنی انتخابات نے بہت سے افسانوی دعووں کو توڑ دیا۔ شفاف انتخابات ہی پاکستان کے آگے بڑھنے کے لیے آئینی حل ہے۔ تمام اداروں کو غیر جانبداری سے عوام کے فیصلے سے ملک کو مشکل حالات سے نکالنا چاہیے، یہی وقت ہے کہ سپریم کورٹ بار ایسوسی ایشن اپنی سمت درست کرے۔

صدر سپریم کورٹ بار احسن بھون نے کہا کہ سپریم کورٹ بار نے کوئی اعلامیہ جاری نہیں کیا ۔ بار کے ایک عہدیدار ریاست علی گوندل نے ذاتی حثیت میں بیان جاری کیا۔ اس کا سپریم کورٹ بار سے کوئی تعلق نہیں۔ موجودہ حکومت کو اپنا وقت پورا کرنا چاہیے۔