کوئی عمران خان کو بتائے کہ اسے کسی اور نے نہیں، اپنی جماعت نے نکالا ہے: مریم نواز کا ردعمل
اسلام آباد:( مظہر چشتی سے ) پاکستان مسلم لیگ (ن) کی مرکزی نائب صدر مریم نواز نے کہا ہے کہ اقتدار کیلئے اس طرح کسی کو روتے پہلی بار دیکھا ہے، رو رہا ہے کہ میرے لیے کوئی نہیں نکلا۔
وزیراعظم عمران خان کے قوم سے خطاب پر سماجی رابطوں کی ویب سائٹ ’ٹوئٹر‘ پہ جاری کردہ اپنے ردعمل میں انہوں نے کہا کہ آپ آنکھیں کھول کے دیکھو، غریب عوام کو ان ساڑھے تین سالوں میں جس طرح تم نے رلایا ہے، وہ شکرانے کے نفل پڑھ رہے ہیں۔
مریم نواز نے کہا کہ شکرانے کے نفل اس لیے پڑھ رہے ہیں کہ تم جیسے سے جان چھوٹی اور جاتے جاتے آئین بھی توڑ دیا۔
ن لیگ کے قائد میاں نواز شریف کی صاحبزادی مریم نواز نے مؤقف اختیار کیا ہے کہ جس بھارت کے قصیدے پڑھ رہے ہیں وہاں مختلف وزرائے اعظم کے خلاف عدم اعتماد کی 27 تحریکیں آئیں، کسی ایک نے بھی آئین، جمہوریت اور اخلاقیات سے یہ کھلواڑ نہیں کیا۔
بھارتی وزیراعظم واجپائی ایک ووٹ سے ہارا، گھر چلا گیا، آپ کی طرح ملک، آئین اور قوم کو یرغمال نہیں بنایا۔
مریم نواز نے کہا کہ کوئی اس شخص کو بتائے کہ اس کو کسی اور نے نہیں، اس کی اپنی جماعت نے باہر نکالا ہے۔
مریم نواز نے وزیراعظم کو مشورہ دیا کہ بھارت اگر اتنا پسند ہے تو وہیں شفٹ ہو جائیں اور پاکستان کی جان چھوڑیے۔