سیاست کیلئے فوج کو بدنام نہ کریں، کسی صورت استعفی نہیں دوں گا، وزیر اعظم
اسلام آباد ( ثاقب ابراہیم غوری سے )مولانا فضل الرحمان کا سیاست سے باہر ہونے کا وقت آ گیا، کسی کی غلط فہمی ہو سکتی ہے کہ گھر بیٹھ جائوں گا ،کسی صورت استعفی نہیں دوں گا۔
وزیر اعظم عمرا ن خان سے صحافیوں کے وفد نے ملاقات کی جس میں عمران خان نے کہا کہ ہم سے جو دور جائے گا وہ پیسے کے لیے جائے گا، میں عدم اعتماد کی تحریک کی ووٹنگ سے ایک دن پہلے اپنے تمام پتے ظاہر کروں گا۔
انہوں نے کہا کہ اپوزیشن نے دباؤ میں آکر اپنے سارے پتے ظاہر کردیے، چوہدری نثار سے 50 سالہ دوستی ہے، میں جو کچھ کر رہا ہوں وزارت عظمیٰ کے لیے نہیں کر رہا، میں واضح کہہ رہا ہوں کہ وہ نہیں جیتیں گے۔
عمرا ن خان نے کہا کہ اپوزیشن نے ہمارے اوپر کرم کیا کہ عوام ہمارے حق میں ہوگئی ہے، نیوٹرل والی بات کا غلط مطلب لیا گیا، نیوٹرل والی بات اچھائی کا حکم دینے اور برائی سے روکنے کے تناظر میں کی۔
وزیراعظم عمران خان نے مزید کہا کہ فضل الرحمان سیاست کا بارہواں کھلاڑی ہے ،فضل الرحمان کے اب ٹیم سے باہر ہونے کا وقت ہو گیا ہے۔ انہوں ںے کہا کہ فوج کو غلط تنقید کا نشانہ بنایا جاتا ہے، مضبوط فوج ملک کی ضرورت ہے ، فوج نہ ہوتی تو ملک کے تین ٹکڑے ہوجاتے ،سیاست کے لیے فوج کو بدنام نہ کیا جائے۔
عمران خان نے کہا کہ ن لیگ اور پی پی کی سیاست چوری اور چوری چھپانا ہے ، کسی کی غلط فہمی ہو سکتی ہے کہ گھر بیٹھ جائوں گا ،کسی صورت استعفی نہیں دوں گا ،کیا چوروں کے دبائو پر استفعی دے دوں؟
