تحریک انصاف کے 14 منحرف ارکان قومی اسمبلی کو شوکاز جاری
اسلام آباد ( یاسر ملک سے )منحرف ارکان کو وزیراعظم کے سامنے پیش ہو کر اپنا موقف بیان کرنے کی ہدایت،26 مارچ دن 2بجے تک غیرمشروط معافی مانگ کرواپسی کی مہلت بھی دیدی
پاکستان تحریک انصاف نے تحریک عدم اعتماد کے معاملے پر 14 منحرف ارکان قومی اسمبلی کو اظہار وجوہ کےنوٹس جاری کردیے ۔
منحرف ارکان کو وزیراعظم عمران خان کے سامنے پیش ہو کر اپنا موقف بیان کرنے کی ہدایت کی گئی ہے جبکہ غیرمشروط معافی مانگ کر واپسی کی مہلت بھی دی گئی ہے۔
پاکستان تحریک انصاف نے سندھ ہاؤس میں سامنے جانب سے پارٹی کے جن 14 منحرف ارکان قومی اسمبلی کو شوکاز نوٹس جاری کیے گئے ہیں۔ان میں نور عالم خان، افضل ڈھاندلا، نواب شیر وسیر، راجہ ریاض، احمد حسین ڈیہر، رانا قاسم نون، غفار وٹو، باسط بخاری اور دیگر شامل ہیں ۔
شوکاز نوٹس میں کہا گیا ہے کہ ارکان وزیراعظم کے خلاف عدم اعتماد لانے والی اپوزیشن سے مل چکے ہیں، ٹی وی چینل کو دیے گئے انٹرویو سے ثابت ہو گیا کہ آپ پارٹی چھوڑ چکے ہیں، منحرف اراکین وزیراعظم کے سامنے پیش ہوں اور اپنا مؤقف پیش کریں۔منحرف ارکان کو 26 مارچ دن 2 بجے سے پہلے غیر مشروط معافی مانگ کر پارٹی میں واپس آنے کی مہلت بھی دی گئی ہے۔