بلاول بھٹو زرداری نے او آئی سی کانفرنس روکنے کی دھمکی دے دی

اسلام آباد (قاری عاشق حسین سے بلاول بھٹو زرداری نے او آئی سی کانفرنس روکنے کی دھمکی دے دی۔ پاکستان پیپلزپارٹی کے چیئرمین بلاول بھٹو زرداری نے وزیر اعظم عمران خان کیخلاف تحریک عدم اعتماد کی ووٹنگ کیلئے 21 مارچ کو قومی اسمبلی کا اجلاس نہ بلانے پر اسلام آباد میں شیڈول او آئی سی کانفرنس کو روکنے کی دھمکی دی ہے۔
چئیرمین پیپلز پارٹی کا کہنا کہ اسپیکر قومی اسمبلی اسد قیصر پیر کے دن عدم اعتماد پیش نہیں کرتے تو ہم ایوان سے نہیں اٹھیں گے، دیکھتے ہیں آپ او آئی سی کی کانفرنس کیسے کرتے ہیں۔ انہوں نے کہا کہ اگر اجلاس میں عدم اعتماد پیش نہ کرنے دی گئی تو دھرنا دیں گے، اپوزیشن جماعتوں کو دھرنے کی تجویز دیتا ہوں، اپنا حق لینے تک اسمبلی میں بیٹھے رہیں گے۔

چیئرمین پیپلزپارٹی نے کہا کہ ہم انتطار کررہے تھے کہ اوآئی سی پرامن طریقے سے گزرجائے، پورا ملک چاہتا ہے کہ عزت کے ساتھ او آئی سی ہو لیکن اگر اجلاس میں عدم اعتماد پیش نہ کرنے دی گئی تو دھرنا دیں گے۔ بلاول بھٹو نے کہا کہ اسپیکر قومی اسمبلی تحریک انصاف کا اسپیکر نہ بنے ملک کا سوچے، اسپیکر آئین، پارلیمان کے رولز توڑنے کو تیار ہے۔
بلاول کی دھمکی پر وفاقی وزیر داخلہ شیخ رشید احمد نے ردعمل دیتے ہوئے کہا کہ ہمت ہے تو او آئی اجلاس روک کر دکھائیں۔ ہم شرافت سے نمٹیں گے یہ بچے ہیں، ہم انہیں پیار سے گھر بھیجیں گے۔ او آئی سی کے شرکا عظیم پاکستان کے مہمان ہیں عظیم فوج ان کی ضامن ہے، اپوزیشن کے ساتھ وہ ہوگی جو یہ نسلوں تک یاد رکھیں گے۔ وفاقی وزیر منصوبہ بندی اسد عمر کا کہنا ہے کہ بلاول بھٹو ہمیں یہ تو پتا تھا آپ مسلمانوں اور ان کے حقوق کی بات کرتے ڈرتے ہیں لیکن اتنی کھلی مسلم دشمنی کہ اسلامی کانفرنس روکنے کی دھمکی دے دی۔
او آئی سی کانفرنس تو ہوگی، مسلم امہ کی یکجہتی کا اظہار بھی ہوگا اور دنیا دیکھے گی،آپ روک سکو تو روک لو۔