پروفیسر کو پی سی بی میں چیف سلیکٹر کے عہدے کی پیشکش
یوتھ ویژن نیوز : قومی کر کٹ ٹیم کے سابق کپتان محمد حفیظ کو پی سی بی میں چیف سلیکٹر کے عہدے کی پیشکش کردی گئی ہے۔
اس بات کا دعویٰ ذمہ دار ذرائع نے کیا ہے جس کے مطابق محمد حفیظ کو یہ پیشکش اس وقت کی گئی جب ان کی چیئرمین مینجمنٹ کمیٹی ذکا اشرف سے ملاقات ہوئی۔
ذرائع کے مطابق ہونے والی ملاقات میں محمد حفیظ نے ذکا اشرف کو چیئرمین مینجمنٹ کمیٹی بننے پر مبارکباد بھی دی۔
سابق ٹیسٹ کرکٹر محمد حفیظ نے اس موقع پر کہا ذکا اشرف اچھے ایڈمنسٹریٹر ہیں، دل سے عزت کرتا ہوں، پاکستان کرکٹ کی بہتری کے لیے اچھی آفر آئی تو ضرور قبول کروں گا۔
ذرائع کے مطابق سابق ٹیسٹ کرکٹرز یونس خان، سلیم یوسف کو بھی سلیکشن کمیٹی میں ذمہ داریاں ملنے کا امکان ہے۔
اسی حوالے سے ذرائع کا کہنا ہے کہ محسن حسن خان کو بھی سلیکشن کمیٹی میں ذمہ داری ملنے کا امکان ہے جب کہ پی سی بی سیٹ اپ میں شعیب اختر کو شامل کرنے پر بھی بات ہوئی ہے۔
