بہاولپور لیٹریری اینڈ کلچر فیسٹیول
تحریر:۔۔۔۔۔۔۔۔ نصیر احمد ناصر
بہاول پور اپنی قدیم تہذیب وثقافت کا امیں ہے۔ یہاں کے نوابوں کی فن تعمیر میں بھی ایک خاص رنگ جھلکتا ہے، محلات ہوں یا تعلیمی اِدارے ہوں ایک ہی رنگ نظر آئے گا۔ بہاول پور سیر وتفریحی اعتبار سے شاندار مقامات رکھتا ہے، وسیعی وعریض چولستان (روہی) کی دھرتی کہا جاتا ہے۔ روہی میں موجود قلعہ جات ایک تاریخی پسِ منظر رکھتے ہیں۔
تعلیمی اِداروں میں اسلامیہ یونیورسٹی کی فنِ تعمیر اور مقصد تعمیر بھی واضح ہے۔ اسلامیہ یونیورسٹی بہاول پور کا قیام، مصر یونیورسٹی الازہر کے طر ز پر عمل میں لایا گیا۔ اس کی پہلی کھیپ میں ہی جید قسم کے دانشور، علما کرام، ملک وقوم کی خدمت کرتے نظر آئے اور ان کے اساتذہ کا شمار بھی ملک بھر کے اہم ترین اساتذہ میں ہوتا ہے۔ اس تعلیمی اِدارے میں ان اساتذہ کا شمارایسا ہوتا ہے جنہوں نے 1935میں مرزائیوں کے خلاف آنے والے فیصلے میں اہم کردار ادا کیا۔
بہاول پور کو اعزاز حاصل ہے کہ دنیا بھر میں مرزائیت کے خلاف پہلا فیصلہ اس دھرتی کے سپوت جج اور علمائے کرام کے مرہون منت ہوا۔ چولستان کا ذکر کیا، چولستان کے متعدد قلعہ جات اور دریائے ہاکڑہ کی تہذیب اپنے اندر وسیع نشیب وفراز پر مبنی قدیمی تاریخ رکھتا ہے۔
چولستان میں جیپ ریلی کا آغاز 2005میں کیا گیا جو ہر سال باقاعدگی کے ساتھ جاری ہے۔ جیپ ریلی میں نہ صرف ملک بھر سے بلکہ بیرون ممالک سے بھی افراد شامل ہوتے ہیں۔ لاکھوں افراد نظارہ کرتے ہیں اگرچہ بعض امیر زادے اس دھرتی کی روایات کے خلاف جشن مناتے نظر آتے ہیں۔ کہاجاتا ہے کہ کہیں کہیں پر خرافات پر مبنی نظاروں کا رنگ نظرآتا ہے۔ انتظامیہ آنکھیں بند کیے رکھتی ہے یعنی ہر طرح کی چھٹی۔۔۔ بہرحال یہ اب ایک بڑا ایونٹ بن چکا ہے۔
اس کے بعد اسلامیہ یونیورسٹی بہاول پور میں گزشتہ تین سالوں سے بہاول پور لٹریری اینڈ کلچرل فیسٹول کا انعقاد جاری ہے جس میں ادبی، سماجی، مذہبی، ثقافتی پروگرام بڑی کامیابی کے ساتھ منعقد کیے جاتے ہیں۔ بلاشبہ ان تمام سرگرمیوں میں طلباء وطالبات کے علاوہ شہریوں کی بڑی تعداد شامل ہوتی ہے۔ یہ تقریبات چار روزجاری رہتی ہیں۔ ان تقریبات کی وجہ سے اسلامیہ یونیورسٹی بہاول پور کی تہذیب وثقافت اور تعلیمی سرگرمیاں ملک بھر میں اپنا اثر چھوڑتی نظر آتی ہیں۔
جب کہ ملک بھر سے صحافی، دانشور، مذہبی اہم افراد ان تقریبات میں شامل ہو کر تقریبات کا حصہ بنتی ہیں جنہوں نے اپنے پیغامات میں بہاول پور اور اس تعلیمی اِدارے کو شاندار انداز میں خراج تحسین پیش کیا۔ اسلامیہ یونیورسٹی بہاول پور کا نام نہ صرف پاکستان بلکہ بیرونی دنیا میں بھی عزت واحترام سے لیا جانے لگا ہے۔ یقینا اس کاوش میں سب سے معتبر نام وائس چانسلراسلامیہ یونیورسٹی بہاول پور انجینئر پروفیسر ڈاکٹر اطہر محبوب کا لیا جانا چاہیے اور ان سرگرمیوں میں سینکڑوں اساتذہ، انتظامی امور سے متعلق افراداور طلباء وطالبات بھی خراج تحسین کے لائق ہیں جو دن رات اس ایونٹ کو کامیاب بنانے کے لئے محنت کرتے ہیں اور بلاشبہ اُن کی دن رات کی محنت سے یہ گول اچیو ہوتا ہے۔ اس سال بھی 27فروری تا 2مارچ2023 تک بہاول پور لٹریری اینڈ کلچرل فیسٹیول کی تقریبات کا انعقاد کیا جا رہا ہے جس کو کامیاب بنانے کے لئے ایک بڑی ٹیم پوری تندہی کے ساتھ کام کر رہی ہے۔
کمشنر بہاول پور ڈاکٹر احتشام انور مہار بھی خصوصی دلچسپی لے رہے ہیں یہاں کی سول سوسائٹی، چیمبر آف کامرس، جم خانہ، صحافی، تاجر برادری بھی اپنا حصہ ڈالتی نظر آئے گی۔ کمشنر بہاول پور کا شمار ان افراد میں ہوتا ہے جو تعلیمی سرگرمیوں کے ساتھ ساتھ غیر تعلیمی سرگرمیوں کو عروج دینے میں اپنا کردار ادا کرتے ہیں۔ ان کے پاس سیکریٹری تعلیم جنوبی پنجاب کا چارج بھی ہے۔ یہ ایک لمبی بحث ہے کہ انہوں نے بحیثیت سیکریٹری کس قدر محنت کر کے تعلیمی اور غیر تعلیمی سرگرمیوں کو نئی راہیں دکھائیں۔ بہرحال ایک طرف ان سرگرمیوں کی حوصلہ افزائی کرنے والوں کی کثیر تعداد موجود ہے اور دوسری طرف آٹے میں نمک کے برابر تنقید کرتے بھی نظر آتے ہیں۔ طرح طرح کے الزام لگائے جاتے ہیں، درخواست بازی کی جاتی ہے، انکوائریاں کرائی جاتی ہیں تب بھی ناکام رہتے ہیں بات پھر وہی کہ جو کام کرے گا تنقید اور الزامات اس پر ہی لگے گے۔ انسانیت میں سب سے بڑی افصل ہستی حضرت محمد ﷺ کی ہے،مٹی سے بننے والے انسان نے اس ہستی کو بھی نہیں بخشا جن کو اللہ نے رحمت العالمین کہا۔ ہم بے چارے انسانوں کا شمار تو گناہ گاروں میں ہوتا ہے جن کی معافی کے طلب گار رہتے ہیں لیکن یہ حقیقت اپنی جگہ کہ جو انسان کسی پر الزام تراشی کرتا ہے، تذلیل وتضحیک کرتا ہے وہ اپنی دنیا و آخرت دونوں خراب کر لیتا ہے۔ بہرحال اس بار بھی ملک بھر سے آنے والے معزز مہمانوں کو بہاول پور اور اسلامیہ یونیورسٹی بہاول پور کی انتظامیہ خوش آمد ید کہتی ہے۔
