سیالکوٹ واقعہ کے ذمہ داروں کو عبرت ناک سزا دی جائے گی، فرخ حبیب
لاہور۔ (مظہر اسحاق چشتی سے ):وزیر مملکت برائے اطلاعات و نشریات فرخ حبیب نے کہا ہے کہ سیالکوٹ واقعہ کے ذمہ داروں کو عبرت ناک سزا دی جائے گی تاکہ مستقبل میں اس طرح کے واقعات کی روک تھام کی جا سکے۔
وہ یہاں ایمرجنسی سروسز اکیڈمی لاہور میں انٹرنیشنل والنٹئیر زڈے کے موقع پر ایوارڈز کی تقسیم کی تقریب میں میڈیا سے گفتگو کر رہے تھے، فرخ حبیب نے کہا کہ پولیس نے واقعہ کے دو مرکزی ملزمان کو گرفتار کرنے کے علاوہ اس سلسلے میں 110 افراد کو گرفتار کیا ہے۔ ایک سوال کے جواب میں انہوں نے کہا کہ پاکستان عالمی سطح پر ناموس رسالتﷺ کا مقدمہ لڑ رہا ہے۔
انہوں نے مزید کہا کہ عوام قانون کو ہاتھ میں نہ لیں اور ریاست کی رٹ کو تسلیم کریں۔ انہوں نے لوگوں کی ذہنیت کو بدلنے کی ضرورت پر زور دیا اور مزید کہا کہ اس سلسلے میں اجتماعی کوششوں کی ضرورت ہے۔ ایک اور سوال پر انہوں نے کہا کہ واقعہ کے حوالے سے جامع انکوائری کی جا رہی ہے۔
تحریک لبیک پاکستان (ٹی ایل پی) کے بارے میں ایک سوال کے جواب میں انہوں نے کہا کہ جہاں تک اس کا تعلق ہے موجودہ حکومت نے عوام کے وسیع تر مفاد میں بات چیت کا آپشن منتخب کیا۔
