پناہ گاہوں میں رمضان المبارک کے مہینے میں روزہ داروں کو خصوصی سہولیات دی جائیں, نسیم الرحمن
رمضان المبارک کے بابرکت مہینے میں تمام پناہ گاہوں میں سحر و افطار و عبادات کا خصوصی اہتمام کیا جائے۔ وزیر اعظم کے فوکل پرسن نسیم الرحمن نے میڈیا کے نمائندگان سے گفتگو کرتے ہوئے بتایا کہ تمام پناہ گاہوں میں رمضان المبارک کے مہینے میں روزہ داروں کو خصوصی سہولیات دی جائیں گی اور سحر و افطار کے اوقات میں انکے کھانے پینے کا خاص خیال رکھا جائے۔ مخیر حضرات کے تعاون سے پناہ گاہ کے مکینوں کو ماہ رمضان میں امدادی پیکج بھی دیئے جائیں گے۔ اس سلسلے میں تمام پناہ گاہوں کے سٹاف کو خصوصی ہدایات جاری کی گئی ہیں۔ انھوں نے کہا کہ وزیراعظم نے رمضان کے مہینے میں پناہ گاہوں میں آنے والے تمام مستحقین کو بہترین سہولتوں کی فراہمی کیلئے خصوصی ہدایات دی ہیں اور پناہ گاہوں کا تمام عملہ خدمت کے جذبے کے ساتھ لوگوں رہائش، کھانے پینے اور میڈیکل کی دستیاب سہولیات مہیا کرے گا۔ اس حوالے سے سٹاف کی خصوصی تربیت کی گئی ہے۔ علاوہ ازیں پناہ گاہوں میں نماز تراویح اور دیگر روحانی محافل کا بھی اہتمام کیا جائے گا۔ نسیم الرحمن نے کہا کہ ہم پناہ گاہوں کو تربیت گاہیں بنانے اور سماجی خدمت کا بہترین پلیٹ فارم بنانے کیلئے پرعزم ہیں۔ انھوں نے مزید کہا کہ سیاسی صورتحال حکومت کی طرف سے عام آدمی کی زندگی بہتر بنائے کیلئے کئے گئے اقدامات پر اثرانداز نہیں ہو گی اور پناہ گاہوں سمیت عام آدمی کو ریلیف فراہم کرنے کے تمام پروگرام جاری و ساری رہیں کیونکہ عام آدمی کا معیار زندگی بلند کرنا موجودہ حکومت کا مشن ہے۔
