ریسکو 1122ملازمین کیلئےخوشخبری، وزیراعلی پنجاب کا بڑا اعلان
لاہور(قاری عاشق حسین سے ) وزیراعلیٰ پنجاب سردار عثمان بزدارکی زیر صدارت وزیراعلیٰ آفس میں پنجاب ایمرجنسی کونسل کا 7واں اجلاس منعقد ہوا،جس میں پنجاب ایمرجنسی سروس ایمپلائزریگولیشن2022ء کی اصولی منظوری دی گئی۔اجلاس میں کابینہ سٹینڈنگ کمیٹی برائے قانونی امور کوپنجاب ایمرجنسی سروس ایمپلائزریگولیشن2022ء کے مسودے کا جائزہ لینے کی ہدایت کی گئی۔اجلاس میں ریسکیورز کیلئے رسک الاؤنس کی منظوری دی گئی۔ریسکیورز کو ایک بنیادی تنخوا ہ کے برابرریسکیوررسک الاؤنس ملے گا۔اجلاس میں محکمہ خزانہ کو رسک الاؤنس کے حوالے سے ضروری اقدامات کی ہدایت کی گئی۔وزیراعلیٰ عثمان بزدار نے کہا کہ پنجاب میں موٹر بائیکس ریسکیو سروس کا دائرہ کارمزید27 اضلاع تک بڑھایا جا رہا ہے اور جولائی تک پنجاب کے تمام اضلاع میں موٹر بائیکس ایمرجنسی ایمبولینس سروس شروع ہوجائے گی۔ انہوں نے کہا کہ ہماری حکومت نے ریسکیو1122سروس کو جدید خطوط پر استوار کیاہے جبکہ سابق حکومت نے اس اہم ادارے کو یکسر نظر انداز کیے رکھا اور8برس تک پنجاب ایمرجنسی کونسل کا اجلاس نہ بلایاگیا۔انہوں نے کہا کہ ہماری حکومت نے ایمرجنسی سروس کو سٹریم لائن کیا ہے۔2015ء کے بعد پہلی بارنئی258ایمبولینس ریسکیو1122کوفراہم کی ہیں۔ پنجاب میں ایئر ایمبولینس سروس بھی شروع کی جارہی ہے۔ ڈی جی پنجاب ایمرجنسی سروس ڈاکٹر رضوان نصیر نے ادارے کی کارکردگی کے بارے میں بریفنگ دی۔ڈاکٹر رضوان نصیر نے کہا کہپنجاب میں ریسکیو سروس کو مضبوط بنانے کیلئے تعاون فراہم کرنے پر وزیراعلیٰ عثمان بزدار کا شکریہ ادا کرتے ہیں -اجلاس میں ریسکیو1122کی کارکردگی کو سراہاگیا۔صوبائی وزیر قانون راجہ بشارت،اراکین پنجاب اسمبلی مسرت چیمہ،خدیجہ عمر،چیف سیکرٹری،انسپکٹر جنرل پولیس، ایڈیشنل چیف سیکرٹری داخلہ،پرنسپل سیکرٹری وزیراعلیٰ،متعلقہ محکموں کے سیکرٹریز،ڈی جی ریسکیو1122ڈاکٹر رضوان نصیراوراعلی افسران نے اجلاس میں شرکت کی۔
