افغانستان کے راستے وسط ایشیائی ریاستوں کو گوادر سے ملانے کیلئے ٹرین سروس پر اتفاق

اسلام آباد:(یاسر ملک سے ) ایک سال میں پاکستان اور ازبکستان کے مابین تجارت میں 50 فیصد جبکہ مشترکہ منصوبوں میں پانچ گنا اضافہ ہوا ہے، ان خیالات کا اظہار وزیراعظم عمران خان نے ازبک صدر شوکت مرزایوف کے ساتھ ملاقات اور وفود کی سطح پر مذاکرات کے بعد مشترکہ پریس میں کہی۔

پاکستان اور ازبکستان نے اقتصادی، تجارتی، سائنس، تعلیم، انفارمیشن اور مذہبی سیاحت سمیت مختلف شعبوں میں تعاون کو مزید مستحکم کرنے اور ٹرین رابطوں پر اتفاق بھی کیا۔

وزیراعظم عمران خان نے جمعرات کو وزیراعظم ہاؤس میں ازبک صدر شوکت مرزایوف کے ساتھ ون آن ون ملاقات اور وفود کی سطح پر مذاکرات کے بعد مشترکہ پریس کانفرنس سے خطاب کرتے ہوئے کہا کہ ہم ازبکستان کے ساتھ دیرینہ تعلقات کو مستحکم کر رہے ہیں۔

انہوں نے کہا کہ گزشتہ ایک سال میں پاکستان اور ازبکستان کے مابین تجارت میں 50 فیصد جبکہ مشترکہ منصوبوں میں پانچ گنا اضافہ ہوا ہے۔ اس کے علاوہ دونوں ملکوں کے کاروباری افراد کے مابین بھی روابط بڑھے ہیں۔

وزیراعظم نے کہا کہ ہم نے ازبکستان کے ساتھ افغانستان کے راستے روابط بڑھانے کا فیصلہ کیا ہے، اس سے دونوں ملکوں کے مابین سیاحت اور تجارت میں اضافہ ہو گا۔

دونوں ملکوں کے مابین افغانستان کے راستے ٹرین چلے گی جو وسط ایشیائی ریاستوں کو گوادر پورٹ سے ملائے گی

پاکستان اور ازبکستان نے اقتصادی، تجارتی، سائنس، تعلیم، انفارمیشن اور مذہبی سیاحت سمیت مختلف شعبوں میں تعاون کو مزید مستحکم کرنے اور ٹرین رابطوں پر اتفاق بھی کیا— فوٹو: پی آئی ڈی
عمران خان نے کہا کہ ٹرین رابطوں پر بھی اتفاق ہوا ہے، دونوں ملکوں کے مابین افغانستان کے راستے ٹرین چلے گی جو وسط ایشیائی ریاستوں کو گوادر پورٹ سے ملائے گی۔

وزیراعظم نے کہا کہ افغانستان کے راستے کنکٹویٹی کا فائدہ نہ صرف ازبکستان اور پاکستان کو ہو گا بلکہ زیادہ فائدہ افغانستان کو ہو گا۔

وزیراعظم نے کہا کہ میں نے ازبک صدر کو مقبوضہ کشمیر کی صورتحال اور پاکستان کے مؤقف سے آگاہ کیا، ہم چاہتے ہیں کہ اقوام متحدہ سلامتی کونسل کی قراردادوں پر عملدرآمد کرتے ہوئے کشمیری عوام کو حق خود ارادیت کا حق دیا جائے اور وہاں بھارتی مظالم کو روکا جائے۔

اسلامو فوبیا کے حوالے سے ازبکستان اورپاکستان کا یکساں مؤقف ہے
ان کا کہنا تھا کہ اسلامو فوبیا کے حوالے سے ازبکستان اورپاکستان کا یکساں مؤقف ہے، مغربی ممالک کے دو سربراہان نے بھی ہمارے مؤقف کی تائید کی ہے ، روس کے صدر ولادیمیر پیوٹن اور کینیڈا کے وزیراعظم جسٹن ٹروڈو نے بھی کہا ہے کہ پیغمبرﷺ کی شان میں گستاخی کو کسی صورت بھی اظہار رائے کی آزادی قرار نہیں دیا جا سکتا۔

پاکستان اور ازبکستان ، افغانستان کے منجمد اثاثوں کی بحالی کیلئے مل کر کام کریں گے
انہوں نے کہا کہ ناموس رسالتﷺ پر مسلم ممالک کو مل کر مہم چلانی چاہیے۔ افغانستان کی صورتحال کے حوالے سے وزیراعظم نے کہا کہ پاکستان اور ازبکستان ، افغانستان کے منجمد اثاثوں کی بحالی کیلئے مل کر کام کریں گے۔

اس موقع پر گفتگو کرتے ہوئے ازبکستان کے صدر شوکت مرزایوف نے مہمان نوازی پر پاکستان کے عوام اور قیادت کا شکریہ ادا کرتے ہوئے کہا کہ پاکستان آنے کا بڑی شدت سے انتظار تھا لیکن کورونا کی وجہ سے تاخیر ہوئی۔

انہوں نے کہا کہ پاکستان کے ساتھ اسٹرٹیجک تعاون کے فروغ کیلئے کام کر رہے ہیں، وزیراعظم عمران خان کے ساتھ دوطرفہ، علاقائی و بین الاقوامی امور پر گفتگو تعمیری رہی، پاکستان کی سیاسی اور ثقافتی ترقی کو قدر کی نگاہ سے دیکھتے ہیں۔

وسطی ایشیا سے مزار شریف، کابل اور پشاور ریلوے کی تعمیر پر مستقبل قریب میں کام شروع ہو گا
انہوں نے کہا کہ وزیراعظم عمران خان کے پروگرام ”نیا پاکستان” اور ازبکستان کا نیا ازبک پروگرام میں بڑی مماثلت پائی جاتی ہے۔ دونوں ملکوں نے ثقافتی شعبوں کی بحالی کیلئے مل کر کام کرنے پر بھی اتفاق کیا ہے۔

انہوں نے کہا کہ وسطی ایشیا سے مزار شریف، کابل اور پشاور ریلوے کی تعمیر پر مستقبل قریب میں کام شروع ہو گا، اس منصوبے سے وسطی ایشیا گوادر پورٹ سے منسلک ہو گا۔

ازبک صدر نے کہا کہ وزیراعظم کے ساتھ ملاقات میں علاقائی سلامتی کا معاملہ بھی زیر بحث لایا گیا۔ ازبک صدر نے افغانستان کی بگڑتی صورتحال پر تشویش کا اظہار کرتے ہوئے عالمی برادری سے مطالبہ کیا کہ وہ انسانی بنیادوں پر افغانستان کے منجمد اثاثے بحال کرے اور افغانستان کو انسانی ہمدردی کی بنیاد پر مدد فراہم کرنا چاہیے۔.