خصوصی افراد کو تکنیکی مہارتیں اور ملازمتیں فراہم کرنا وقت کی اہم ضرورت ہے، خاتون اول ثمینہ عارف علوی کا تقریب سے خطاب
ملتان۔(ثاقب ابراہیم غوری سے ):صدر مملکت ڈاکٹر عارف علوی کی اہلیہ خاتون اول محترمہ ثمینہ عارف علوی نے کہا ہے کہ خصوصی افراد کو تکنیکی مہارتیں اور ملازمتیں فراہم کرنا وقت کی اہم ضرورت ہے تاکہ انہیں مرکزی دھارے میں لا کر قومی ترقی کے عمل کاحصہ بنایا جاسکے۔ان خیالات کااظہار انہوں نے غیرسرکاری تنظیم ”تارے زمین پر“ کے زیراہتمام” اپنا روزگار سکیم “کے تحت منعقدہ تقریب میں مہمان خصوصی کے طورپر اظہار خیال کرتے ہوئےکیا۔ خاتون اول نے کہاکہ عالمی ادارہ صحت کی رپورٹ کے مطابق ملک کی15فیصد آبادی مختلف حوالوں سے معذوری کاشکارافراد پرمشتمل ہے۔ان افراد کو اگرتربیت فراہم کی جائے تو وہ ملکی ترقی میں اہم کردار ادا کرسکتے ہیں۔اس سے ان کا اپنامستقبل بھی محفوظ ہوگا اور وہ بہتر اورباوقارانداز میں زندگی گزار سکیں گے۔ ثمینہ عارف علوی نے کہاکہ حکومت نے خصوصی افراد کے لیے ملازمتوں میں پانچ فیصد کوٹہ مختص کیا ہے اور اس کابنیادی مقصد یہ ہے کہ ان کی صلاحیتوں سے بھرپور فائدہ اٹھایا جائے۔
حکومت نے سٹیٹ بینک آف پاکستان اور دیگر محکموں سے کہا ہے کہ وہ پانچ فیصد کوٹے پر عملدرآمد کو یقینی بنائیں۔ انہوں نے کہاکہ ضرورت اس بات کی ہے کہ معاشرہ بھی معذور افراد کے بارے میں اپنے روایتی طرز عمل کو تبدیل کرے اور ایسے بچوں اورافراد کو بوجھ نہ سمجھے۔انہیں بہتر زندگی گزارنے کے لیے مختلف مہارتوں کی تربیت فراہم کی جانی چاہیے۔انہوں نے اس بات پر زور دیا کہ تمام شہروں اور عوامی مقامات پر خصوصی افراد کے لیے سہولتیں فراہم کی جائیں اور سڑکوں اور عوامی مقامات کو اس انداز میں ڈیزائن کیا جائے کہ خصوصی افراد کو آمدورفت میں آسانی ہو۔ ایسے افراد کو سکولوں ،یونیورسٹیوں ،کالجوں اور دیگر مقامات پرصحت مند ماحول فراہم کیا جائے ا ورانہیں معاشرے سے الگ تھلگ نہ رکھا جائے۔اس موقع پر ثمینہ عارف علوی نے تین خصوصی افراد کو ان کے لیے تیارکیے گئے رکشے اور پانچ افراد کو وھیل چیئرز فراہم کیں۔یہ رکشے اس طرح ڈیزائن کیے گئے ہیں کہ ان کی مدد سے یہ خصوصی افراد مختلف اشیاءفروخت کرکے اپنا روزگاربہتربناسکتے ہیں ۔قبل ازیں تارے زمین پر کی چیف ایگزیکٹو آفیسر فریدہ کاشف نے خاتون اول کو اپنی تنظیم کی فلاحی سرگرمیوں سے آگاہ کیا۔ انہوں نے بتایا کہ ہم نے امراض قلب کا شکار بچوں کی سرجری کے لیے کارڈیالوجی انسٹی ٹیوٹ ملتان کوخصوصی مشینری عطیہ کی ہے۔وزیراعظم کے خصوصی معاون برائے سیاسی امور اور چیف وہپ قومی اسمبلی ملک عامرڈوگر او ر سینیٹرو معاون خصوصی سید عون عباس بپی بھی اس موقع پر موجودتھے