پیٹرولیم مصنوعات کی قیمتوں میں بڑا اضافہ
اسلام آباد ( واصب ابراہیم غوری سے ) وفاقی حکومت نے اگلے 15 روز کے لیے پیٹرولیم مصنوعات کی قیمتوں میں بڑا اضافہ کر دیا ہے۔
وزارت خزانہ کی جانب سے نوٹی فکیشن کے مطابق پٹرول کی قیمتوں میں 12 روپے تین پیسے اضافہ ہوا ہے جس کے بعد اس کی نئی قیمت 159.86 روپے ہو گئی ہے۔
نوٹی فکیشن کے مطابق ہائی اسپیڈ ڈیزل کی قیمت میں 9.53 اضافہ کیا گیا ہے جس کے بعد اس کی نئی قیمت 154.15 ہو گئی ہے۔
مٹی کے تیل کی قیمت میں 10.8 جب کہ لائٹ ڈیزل کی قیمت میں 9.43 روپے کا اضافہ کیا گیا ہے۔
نوٹی فکیشن کے مطابق مٹی کے تیل کی نئی قیمت میں 126.97 جب کہ لائٹ ڈیزل کی نئی قیمت 123.97 ہو گئی ہے۔ قیمتوں کا اطلاق آج رات 12 بجے سے ہو گا۔
خیال رہے کہ اس سے پہلے وزیراعظم عمران خان نے پیٹرول کی قیمتوں میں اضافے کی سمری نظر ثانی کے لئے وزارت خزانہ کو واپس بھیج دی تھی۔
ذرائع کے مطابق وزیراعظم نے کہا تھا کہ پٹرول کی قیمتوں میں اتنا اضافہ نہیں کر سکتے۔
اوگرا نے آئی ایم ایف کی شرائط کے مطابق پٹرول کی قیمتوں میں 12 روپے فی لیٹر اضافے کی تجویز دی تھی۔
