پی آئی اے طیارے کا دوران لیںڈنگ کھڑکی کا شیشہ ٹوٹ گیا
یوتھ ویژن نیوز (قاری عاشق حسین سے ) پی آئی اے پرواز741کے طیارے کی جدہ ایئرپورٹ پر دوران لیںڈنگ کھڑکی کا شیشہ ٹوٹ گیا، پرواز کئی گھنٹے تاخیر کا شکار رہے گی۔
اس حوالے سے ذرائع کا کہنا ہے کہ جدہ میں پی آئی اے عملے کے پاس متبادل شیشہ نہ ہونے کے باعث واپسی کی پرواز میں 16 گھنٹوں کی تاخیر ہوگی۔
بوئنگ 777 طیارے کے 3 سو سے زائد مسافر وطن آمد میں تاخیر سے ذہنی اذیت کا شکار ہیں، گزشتہ روز اسلام آباد سے جدہ پہنچنے والے متاثرہ طیارے کو پی کے 740 کی صورت آج واپس آنا تھا۔
ذرائع کے مطابق متبادل شیشہ آج کراچی سے پرواز نمبر 731 کے ذریعے جدہ روانہ کیا گیا ہے، متاثرہ طیارے کے باعث جدہ کے لئے جمعہ تک کی پروازوں کا شیڈول شدید متاثر ہوگا۔
ذرائع کا مزید کہنا ہے کہ متاثرہ طیارے میں خرابی کے باعث جدہ کی متاثرہ پروازوں کی تعداد 8 اور مسافروں کی تعداد دو ہزارسے زائد ہوگئی ہے۔
ترجمان پی آئی اے نے اس حوالے سے بتایا کہ طیارے کا شیشہ دوران لینڈنگ کسی بیرونی چیز کے لگنے سے ٹوٹا ہے، متبادل شیشہ جدہ ائپورٹ پہنچ گیا ہے، مرمت کے بعد طیارہ وطن واپسی کے لئے آج اڑان بھرے گا۔
