کورونا کیسز میں اضافہ، فلائٹس میں مسافروں کو ماسک پہننا لازمی قرار
کراچی: ڈومیسٹک فلائٹس میں مسافروں کو فیس ماسک کا استعمال دوبارہ لازمی قرار دے دیا گیا ہے۔
پاکستان سول ایوی ایشن اتھارٹی (سی اے اے) نے ڈومیسٹک فلائٹس سے متعلق ایئرلاینز کو نیا ہدایت نامہ جاری کردیا ہے۔
جاری کردہ ہدایت نامے کے مطابق سی اے اے نے ملک کے اندر پروازوں میں ماسک کا استعمال ایک بار پھر لازمی قرار دے دیا ہے۔
سول ایوی ایشن اتھارٹی نے بتایا کہ یہ فیصلہ کورونا کیسز میں اضافے کے باعث کیا گیا ہے۔
ہدایت نامے کے مطابق فیس ماسک سے متعلق سول ایوی ایشن کا فیصلہ فوری طور پر نافذ العمل ہوگا جبکہ کورونا سے متعلق دیگر گائیڈ لائنز میں کوئی تبدیلی نہیں کی گئی ہے۔
سی اے اے کا کہنا ہے کہ تمام ایئرلاینز دوران پرواز مسافروں کے ماسک پہننے کے حکم نامے پر لازمی عمل درآمد کرائیں۔
واضح رہے کہ ملک میں کورونا وائرس سے مزید دو افراد انتقال کرگئے ہیں جبکہ مزید 382 افراد میں وائرس کی تصدیق ہوئی ہے۔
قومی ادارہ صحت کے مطابق گزشتہ روز 13 ہزار 412 ٹیسٹ کئے گئے جس میں مثبت کیسز کی شرح 2 اعشاریہ آٹھ پانچ فیصد رہی۔