کراچی میں 20 کلو آتے کے تھیلے کی قیمت 1470 ، لاہور میں 1100 ہے, فرخ حبیب
کراچی۔5نومبر (عمران منیر قذافی سے):وزیر مملکت برائے اطلاعات و نشریات فرخ حبیب نے کہا ہے کہ جب دوسرے صوبے عوام کو ریلیف دینے کے لیے گندم اور چینی جیسی غذائی اجناس پر سبسڈی دے رہے ہیں توسندھ حکومت نے صوبے اور خصوصا کراچی کے غریب عوام کو مافیا اور منافع خوروں کے رحم و کرم پر چھوڑ ا ہواہے۔
ان خیالات کااظہار انہوں نے جمعہ کو گورنر سندھ عمران اسماعیل اور سندھ اسمبلی میں قائد حزب اختلاف حلیم عادل شیخ کے ہمراہ گورنر ہائوس میں پریس کانفرنس سے خطاب میں کیا۔وزیرمملکت فرخ حبیب نے کہا کہ پاکستان پیپلز پارٹی صوبہ سندھ میں گزشتہ 13 سال سے حکومت میں ہے لیکن وہ اپنی ذمہ داری لینے کو تیار نہیں اور صرف مگرمچھ کے آنسو بہا رہی ہے۔پاکستان بیورو آف شماریات کے اعداد و شمار بتاتے ہوئے انہوں نے کہا کہ کراچی میں 20 کلو آٹے کا تھیلا 1470 روپے میں فروخت ہو رہا ہے جبکہ لاہور میں اس کی قیمت1100 روپے ہے۔
وزیرمملکت نے کہا کہ حکومت پنجاب نے بروقت سبسڈی نرخوں پر گندم کی فلورملوں کو فراہمی کو یقینی بنایا جس کی وجہ سے وہاں قیمتیں کم ہوئی ۔ انہوں نے کہا کہ وفاقی حکومت نے سندھ حکومت کو کئی بار یاد دلایا کہ سٹورزمیں موجود 12 لاکھ ٹن گندم کا ذخیرہ جاری کیا جائے لیکن سندھ حکومت نے اس حوالے سے فیصلے کا اعلان 15 اکتوبر کو کیا جبکہ پنجاب نے تقریبا ڈیڑھ ماہ قبل ریلیز شروع کر دی تھی۔ انہوں نے مزید کہا کہ سندھ میں وفاقی حکومت کے مشورے کو قبول نہیں کیا گیا جو سندھ اور پنجاب میں گندم کے آٹے کی قیمتوں میں فرق کی وجہ ہے ۔
وزیر مملکت فرخ حبیب نے کہا کہ چینی کا بھی یہی حال ہے ، پنجاب میں چینی 90 روپے فی کلوگرام فراہم کی جارہی ہے جبکہ دستیاب اعداد وشمار کے مطابق کراچی میں 125 روپے فی کلوفروخت کی جارہی ہے ، انہوں نے سوال اٹھایا کہ حکومت سندھ کہا ں ہے اور اس حوالے سے ان کی مداخلت کہا ں ہے ۔ انہوں نے مزید کہا کہ سندھ میں آپریشنل شوگرملیں بھی بند کردی گئی ہیں ۔\
