آرمی چیف جنرل قمر جاوید باجوہ سے پاکستان میں چین کے سفیر اور نو تعینات دفاعی اتاشی کی ملاقات

راولپنڈی (نیوز ڈسیک ) آرمی چیف جنرل قمر جاوید باجوہ سے پاکستان میں چین کے سفیر نونگ رونگ اور نو تعینات دفاعی اتاشی میجر جنرل یانگ یانگ نے یہاں جی ایچ کیو میں ملاقات کی۔ ملاقات میں باہمی دلچسپی کے امور، افغان امن عمل سمیت علاقائی سلامتی کی صورتحال اور دوطرفہ تعاون کو مزید بڑھانے کے اقدامات پر تبادلہ خیال کیا گیا۔ پاک فوج کے شعبہ تعلقات عامہ کے مطابق اس موقع پر آرمی چیف نے علاقائی استحکام کے حصول کے لئے پرامن اور خوشحال افغانستان کے لئے کوششوں کو یکجا کرنے کی ضرورت کا اعادہ کیا۔انہوں نے چین کے نئے دفاعی اتاشی کو ان کی تقرری پر مبارکباد دی اور ان کے پیشرو کی کوششوں کو سراہا۔ چینی معززین نے پاکستان میں سی پیک منصوبوں کے لئے محفوظ ماحول کی فراہمی اور علاقائی استحکام کی کوششوں کے لئے کئے گئے خصوصی اقدامات پر آرمی چیف کا شکریہ ادا کیا۔