ملک میں ڈالرز کی آمد کی رفتار مزید سست، ترسیلات اورایکسپورٹ میں کمی کا انکشاف

یوتھ ویژن نیوز :2 ماہ کے دوران پاکستان کی ترسیلات اور ایکسپورٹ میں بہت زیادہ کمی ہو جانے کا انکشاف، نئے مالی سال کے ابتدائی 2 ماہ جولائی اور اگست میں پاکستان کو ایکسپورٹس کی مد میں صرف سوا 4 ارب ڈالرز حاصل ہو سکے

جبکہ نئے مالی سال کے پہلے ماہ میں ترسیلات زر میں بھی 50 کروڑ ڈالرز کی بہت بڑی کمی ہوئی۔ تفصیلات کے مطابق ملک میں ڈالرز کی آمد کی رفتار مزید سست ہو گئی ہے۔

یہ بھی پڑھیں: ملک میں مہنگائی کی شرح اضافہ، 26.32 فیصد ہوگئی

میڈیا رپورٹس کے مطابق ادارہ شماریات کی جانب سے جاری کردہ اعداد و شمار میں پاکستان کی ایکسپورٹس میں بڑی کمی ہونے کا انکشاف ہوا ہے۔ بتایا گیا ہے کہ نئے مالی سال کے پہلے ماہ جولائی میں ایکسپورٹس کا حجم محض 2 ارب ڈالرز رہا تھا، جبکہ اگست میں ایکسپورٹس کا حجم 2 ارب 36 کروڑ ڈالرز رہا۔
یوں مالی سال کے پہلے 2 ماہ میں ملکی ایکسپورٹس میں سالانہ بنیادوں پر26 فیصدکی کمی ریکارڈکی گئی۔

جبکہ رواں مالی سال کے آغاز کے بعد سے ترسیلات کے حجم میں بھی نمایاں کمی ہوئی ہے۔ جولائی 2023 میں ترسیلات کا حجم 2 ارب ڈالرز سے کچھ زائد رہا تھا، جبکہ اگست کے دوران بھی ترسیلات کا حجم کم رہا ہے۔ بتایا گیا ہے کہ پاکستان کی ترسیلات اور ایکسپورٹس کا حجم ایسے وقت میں کم ہوا ہے جب پاکستان کو ڈالرز کی بے انتہاء ضرورت ہے۔ پاکستان کے زرمبادلہ ذخائر میں دوبارہ سے تیزی سے کمی ہونے لگی ہے، سرکاری زرمبادلہ ذخائر دوبارہ 8 ارب ڈالرز کی سطح سے نیچے آ چکے ہیں۔

یہ بھی پڑھیں: نیپرا کا عوام کوایک اوربجلی کاجھٹکا،ایک روپے46 پیسےفی یونٹ بجلی مہنگی کردی،نوٹفیکشن جاری
واضح رہے کہ 13 جماعتوں کی سابقہ اتحادی حکومت کے ایک سال میں پاکستان کو ایکسپورٹس اور ترسیلات میں 8 ارب ڈالرز کا نقصان ہوا۔ اپریل 2022 میں ختم ہونے والی تحریک انصاف کی حکومت میں ترسیلات اور ایکسپورٹس دونوں شعبوں کا حجم 30،30 ارب ڈالرز کی سطح سے اوپر تھا، جو اب اربوں ڈالرز کم ہو چکا، جبکہ اس میں مزید کمی کا بھی خدشہ ظاہر کیا جا رہا ہے