نوجوانوں کی صلاحیتوں کو ابھارنے کیلئے بھاولپور میں ٹیلنٹ ہنٹ پروگرام 2021-22 کے تحت طلبہ طالبات میں مقابلہ جات کا انعقاد
بہاول پور: (علی رضا غوری سے )وزیر اعلی پنجاب سردار عثمان بزدار کی ہدایت پر پنجاب کونسل آف دی آرٹس بہاول پور ڈویژن کے تحت پنجاب ٹیلنٹ ہنٹ پروگرام 2021-22 کے تحت ضلع بہاول پور میں تھیٹر، دستکاری اور افسانہ نگاری کے مقابلہ جات کا انعقاد کیا گیا جس میں 16 تا 40 سال کی عمر کے مرد و خواتین اور طلبہ و طالبات نے حصہ لیا اور اپنے فن کا بہترین مظاہرہ کیا۔ڈائریکٹر بہاول پور آرٹس کونسل محمد سلیم قیصر نے اس موقع پر منعقدہ تقریب میں اظہار خیال کرتے ہوئے کہا کہ پنجاب ٹیلنٹ ہنٹ پروگرام اپنی نوعیت کا منفرد اور اہم پروگرام ہے جو فن و ثقافت کو فروغ دے گا۔ انھوں نے کہا کہ اس پروگرام کے ذریعہ ہنرمندوں اور فنکاروں کو آگے بڑھنے کے مواقع فراہم کرنا اور وزیر اعلی پنجاب کے مشن کو پرموٹ کرنا ہماری اولین ترجیح ہے۔ان مقابلہ جات میں ججز کے فرائض ڈاکٹر نصراللہ خان ناصر، ڈاکٹر اسلم ادیب، ڈاکٹر نواز کاوش، ڈاکٹر عامر سہیل، ڈاکٹر خالد اقبال، ڈاکٹر ناصر حمید، ماریہ انصاری، عابدحسن رضوی اور رابعہ صدف نے انتہائی پیشہ ورانہ طریقہ سے انجام دیئے۔ نتائج کے مطابق مقابلہ دستکاری میں محمد ابراہیم نے اول، شازیہ بی بی نے دوم اور مومنہ الظاہرہ نے سوم پوزیشن حاصل کی۔ مقابلہ تھیٹر میں ذیشان اکبر، رشید جان اور ہاشم ثاقب نے بالترتیب پہلی دوسری اور تیسری پوزیشن حاصل کی۔ مقابلہ افسانہ نگاری میں قراۃلعین نے اول، محمد ذوالقرنین جواد نے دوسری اور سمیہ نے تیسری پوزیشن لی۔ ڈائریکٹر بہاول پور آرٹس کونسل محمد سلیم قیصر نے مقابلہ دستکاری اور افسانہ نگاری میں پوزیشن حاصل کرنے والوں کو بالترتیب 20 ہزار،15 ہزار اور10 ہزار اور مقابلہ تھیٹر میں پوزیشن حاصل کرنے والوں کو بالترتیب 40 ہزار، 35 ہزار اور 30 ہزار روپے کے چیک دئیے جبکہ شرکت کرنے والے تمام امیدواروں میں اسناد تقسم کی گئیں۔ اس موقع پر مقابلہ میں شرکت کرنے والے نوجوانوں نے وزیر اعلی پنجاب کے اقدام اور بہاول پور آرٹس کونسل کے تعاون اور بہترین ماحول فراہم کرنے پر انکا شکریہ ادا کیا۔ یہ مقابلہ جات رشدیہ آڈیٹوریم میں منعقد ہوئے جہاں عمائدین شہر کی بڑی تعداد نے شرکت کی اور پنجاب حکومت کے اس اقدام کو بے حد سراہا۔ تقریب کی نظامت کے فرائض اسسٹنٹ ڈائریکٹر سہیل کامران میتلانے سرانجام دیئے۔