نوجوانوں کو کھیلوں کی سرگرمیوں میں مصروفِ عمل رکھنے کے لئے چار ارب روپے کے 4 نئے منصوبے شروع کئے،عثمان ڈار
اسلام آباد۔(عمران قذافی سے ):معاونِ خصوصی برائے اُمورِ نوجوانان عثمان ڈار نے کہا ہے کہ ملکی تاریخ میں پہلی بار کامیاب جوان پروگرام اور ہائر ایجوکیشن کمیشن کے اشتراک سے نوجوانوں کو غیر نصابی اور کھیلوں کی سرگرمیوں میں مصروفِ عمل رکھنے کے لئے چار ارب روپے کے 4 نئے منصوبے شروع کئے گئے ہیں،نوجوانوں کی کھیل کے میدان میں صلاحیتوں اور لگن کو سمجھتے ہوئے کامیاب جوان ٹیلنٹ ہنٹ اور سپورٹس اکیڈمیز کا قیام عمل میں لایا جا رہا ہے،
کامیاب جوان ٹیلنٹ ہنٹ کے پہلے فیز میں 12 کھیل بشمول ہاکی، کرکٹ، فٹ بال، ہینڈ بال، ریسلنگ، ویٹ لفٹنگ، اسکواش، والی بال، اسکی ، جوڈو، باکسنگ اور ایتھلیٹکس شامل ہیں۔ انہوں نے یہ بات ہفتہ کوپاکستان ہاکی فیڈریشن کے سیکرٹری/اولمپین آصف باجوہ سے ملاقات کے دوران کہی ۔عثمان ڈار نے کہا کہ خواتین کی شمولیت کو یقینی بنانے کے لئے ملک بھر میں دس مختلف کھیلوں کی سرگرمیاں ترتیب دی گئی ہیں
جبکہ ٹیلنٹ ہنٹ کے ذریعے باصلاحیت کھلاڑیوں اور ابھرتے ہوئے ستاروں کی نشاندہی اور چناؤ کے لئے ضلعی اور ملکی سطح پہ ملک کے تمام صوبوں بشمول گلگت بلتستان اور آزاد جموں و کشمیر کے 25 علاقہ جات میں کھیلوں کے مقابلے کرائے جائیں گے۔ عثمان ڈار نے کہا کہ کامیاب جوان اسپورٹس ڈرائیو کے تحت 12 یونیورسٹیوں میں عالمی میعار کی اسپورٹس اکیڈمیاں اور ہائی پرفارمنس سنٹرز قائم کئے جارہے ہیں
جہاں نہ صرف کامیاب کھلاڑیوں کو ٹریننگ فراہم کی جائے گی اورکامیاب کھلاڑیوں کو قومی اور عالمی سطح پہ کھیلنے اور پاکستان کی نمائندگی کرنے کا سنہرا موقع فراہم کیا جائے گا۔
اس موقع پر پاکستان ہاکی فیڈریشن کے سیکرٹری/اولمپین آصف باجوہ نے کہا کہ کامیاب جوان پروگرام کے تحت کھیلوں کے فروغ کیلئے شروع کیےگئے منصوبے انتہائی خوش آئند ہے اوران منصوبوں سے مختلف کھیلوں میں قومی سطح پر ٹیلنٹ ہنٹ کے ذریعے باصلاحیت جوان سامنے آئینگے۔ آصف باجوہ نے کہا کہ کامیاب جوان پروگرام کے ساتھ ملکر ملک میں ہاکی کے فروغ کیلئے تیار ہیں۔
