بابر اعظم ایک بار پھر ٹی 20 کے نمبر ون بیٹر بن گئے
دبئی۔ (علی رضا غوری سے ):انٹرنیشنل کرکٹ کونسل (آئی سی سی) نے ٹی 20 اور ٹیسٹ پلیئرز کی تازہ ترین درجہ بندی جاری کر دی ہے، بابر اعظم ٹی 20 اور مارنس لابوشین ٹیسٹ میں نمبر ون بیٹر بن گئے ہیں۔ محمد رضوان بہترین کارکردگی کی بدولت تیسرے نمبر پر آگئے ہیں۔ بائولنگ میں شاہین شاہ آفریدی اور شاداب خان ٹاپ ٹین پوزیشن پر برقرار ہیں۔
آئی سی سی نے گزشتہ روز ٹی 20 اور ٹیسٹ پلیئرز کی رینکنگ کا اعلان کر دیا ہے جس کے مطابق پاکستانی کپتان بابر اعظم مشترکہ طور پر ٹی 20 کے نمبر ون بیٹر بن گئے ہیں۔ بابر اعظم اور انگلینڈ کے ڈیوڈ ملان کے یکساں 805 پوائنٹس ہیں۔2021 میں سب سے زیادہ رنز بنانے والے پاکستانی وکٹ کیپر بیٹر محمد رضوان چوتھے سے تیسرے نمبر پر پہنچ گئے۔
بائولرز رینکنگ میں پاکستان کے شاداب خان نویں پوزیشن پر برقرار ہیں جبکہ شاہین شاہ آفریدی 12 ویں اور حارث روف کی 22 ویں پوزیشن ہے۔ سری لنکا کے ونندو ڈی سلوا پہلی پوزشین پر براجمان ہیں۔ ٹیسٹ بیٹنگ رینکنگ میں آسٹریلیا کے مارنس لابوشین نے عمدہ کارکردگی کی بدولت انگلش کپتان جو روٹ سے پہلی پوزیشن چھین لی ہے، جو روٹ ایک درجہ تنزلی کے ساتھ دوسرے نمبر پر آگئے ہیں۔
آسٹریلیا کے سٹیون سمتھ تیسرے جبکہ پاکستان کے بابر اعظم 9 ویں نمبر پر برقرار ہیں۔ ٹیسٹ بائولرز رینکنگ میں آسٹریلیا کے پیٹ کمنز پہلے، بھارت کے روی چندرن ایشون دوسرے اور پاکستان کے شاہین شاہ آفریدی تیسرے نمبر پر ہیں