(ن) لیگ کے رہنمائوں کی منی لانڈرنگ کے ثبوت چالان میں پیش کر دیئے گئے ہیں، کیسز کی لائیو کوریج سے قوم کو پتہ چلے گا کہ یہ اندر کیاکہتے ہیں اور باہر کیا کہتے ہیں، ڈاکٹرشہباز گل
اسلام آباد۔(عمران قذافی سے ):وزیر اعظم کے ترجمان و معاون خصوصی برائے سیاسی ابلاغ ڈاکٹرشہباز گل نےکہا ہے کہ (ن) لیگ کے رہنمائوں کی منی لانڈرنگ کے ثبوت چالان میں پیش کر دیئے گئے ہیں، کیسز کی لائیو کوریج سے قوم کو پتہ چلے گا کہ یہ اندر کیاکہتے ہیں اور باہر کیا کہتے ہیں، جب تک ای وی ایم نہیں آئے گی فوت شدگان کے ووٹ ڈالے جائیں گے۔
ان خیالات کا اظہار انہوں نے جمعہ کو یہاں وفاقی وزیر برائے اطلاعات و نشریات چوہدری فواد حسین ، وزیرداخلہ شیخ رشید احمد اور وزیر مملکت برائے طلاعات و نشریات فرخ حبیب کے ہمراہ میڈیاسے گفتگو کرتے ہوئے کیا۔ انہوں نے کہاکہ شریف خاندان پر ایک سال قبل منی لانڈرنگ کے الزامات لگے پھر ان اس کی انکوائری ہوئی اور اب ثبوتوں کے ساتھ چالان عدالت میں پیش کردیا گیا ہے ، ان کے ملازموں، چپڑاسیوں، کلرکوں کے اکائونٹ سامنے آئے ہیں جن میں اربوں روپے منتقل ہوئے اور نکالے گئے۔
انہوں نے کہاکہ حکومت نے اپنی ذمہ داری پوری کی ہے ، اب عدالتوں نے ان مقدمات کا فیصلہ کرنا ہے۔ عدلیہ سے گزارش ہے کہ ان مقدمات کی دوران سماعت لائیو کوریج ہونی چاہیے تاکہ عوام کو حقائق سےآگاہی ملے۔
انہوں نے کہا کہ میڈیابھی حقائق دکھائے۔ معاون خصوصی نے کہا کہ خانیوال کے انتخابات میں ایک فوت شدہ شخص نے دو پولنگ سٹیشن پرووٹ ڈالا۔ ایک شخص نے کہاکہ اس کی بیوی پانچ سال قبل فوت ہو گئی تھی، وہ بھی ووٹ ڈالنے آئی۔ مسلم لیگ (ن ) کو فوت شدگان کے ووٹ ڈالنے میں مہارت ہے۔ جب تک ای وی ایم نہیں آئے گی فوت شدگان کے ووٹ ڈالے جائیں گے۔
