آئی سی سی ٹیسٹ اور ٹی۔20 پلیئرز رینکنگ، بابر اعظم کی تنزلی، شاداب کی ترقی
دبئی۔ (علی رضا سے ):انٹرنیشنل کرکٹ کونسل (آئی سی سی )نے ٹیسٹ اور ٹی ۔20 پلئیرز کی تازہ ترین عالمی رینکنگ جاری کر دی ہے ، پاکستان کرکٹ ٹیم کے کپتان اور مایہ ناز بلے باز بابر اعظم کی ٹیسٹ اور ٹی ۔20 کرکٹ کی عالمی رینکنگ میں تنزلی ہوئی ہے ۔
آئی سی سی کی طرف سے جاری کردہ تازہ ترین نئی ٹیسٹ پلئیرز رینکنگ میں انگلینڈ کے کپتان اور مایہ ناز بلے باز جو روٹ بدستور پہلے نمبر پر براجمان ہیں ، آسٹریلیا کے مارنوس لبو شین دو درجے ترقی پاکر کیرئیر کی بہترین رینکنگ حاصل کرکے دوسرے نمبر پر پہنچ گئے ہیں جبکہ سٹیو سمتھ ایک درجہ تنزلی کے بعد دوسرے سے تیسرے نمبر پر چلے گئے ہیں۔
نیوزی لینڈ کے کپتان کین ولیمسن کی بھی ایک درجہ تنزلی ہوئی ہے اور وہ تیسرے سے چوتھے نمبر پر چلے گئے ہیں جبکہ پاکستان کرکٹ ٹیم کے کپتان بابر اعظم ایک درجے تنزلی کے بعد آٹھویں سے نویں نمبر پر چلے گئے ہیں۔بیٹنگ میں محمد رضوان کا 18 واں ، فواد عالم کا 20 واں اور عابد علی کا 22 واں نمبر ہے ، بائولنگ کے شعبے میں آسٹریلیا کے پیٹ کمنز پہلے نمبر پر بدستور قائم ہیں، پاکستان کرکٹ ٹیم کے فاسٹ بائولر شاہین شاہ آفریدی بدستور تیسرے نمبر پر موجود ہیں ، حسن علی دسویں نمبر پر ہیں جبکہ ساجد خان 52 درجے بہتری کے ساتھ 49 ویں نمبر پر پہنچ گئے ہیں۔
آل راؤنڈرز میں ویسٹ انڈیز کے جیسن ہولڈر پہلے نمبر پر ہے،بھارت کے روی چندرن ایشون دوسرے جبکہ راویندرا جدیجہ تیسرے نمبر پر ہیں۔ ٹی ۔20کرکٹ میں بلے بازوں کی فہرست میں انگلینڈ کے ڈیوڈ میلان پہلے نمبر پر موجود ہیں ، جنوبی افریقاکے ایڈن مارکرم ایک درجہ ترقی پاکر دوسرے نمبر پر پہنچ گئے ہیں جبکہ بابر اعظم ایک درجے تنزلی کے بعد دوسرے سے تیسرے نمبر پر چلے گئے ہیں، محمد رضوان چوتھے نمبر پر قائم ہیں۔ حیدر علی 88 درجے ترقی پانے کے بعد 98 ویں نمبر پر پہنچ گئے ہیں ۔
بائولنگ کے شعبے میں پہلا نمبر سری لنکا کے وانندو ہسارنگا کا ہے ، شاداب خان کی ایک درجہ ترقی ہوئی ہے اور وہ دسویں سے نویں نمبر پر پہنچ گئے ہیں۔
حارث روف تین درجے ترقی کے بعد 19 ویں اور محمد نواز 29 درجے ترقی کے بعد 54 ویں نمبر پر پہنچ گئے ہیں۔ ٹی ۔20 آل راؤنڈرز کی فہرست میں افغانستان کے محمد نبی پہلے نمبر پر قائم ہیں۔ بنگلہ دیش کے شکیب الحسن دوسرے جبکہ انگلینڈ کے لیم لیونگ سٹون تیسرے نمبر پر ہیں۔