وائس چانسلر اسلامیہ یونیورسٹی آف بہاولپور انجینئر پروفیسر ڈاکٹر اطہر محبوب کا بہاولپور چیمبر آف کامرس اینڈ انڈسٹری کا وزٹ

بہاول پور( عمران قذافی سے ) وائس چانسلر کا بہاول پورچیمبرآف کامرس کادورہ’ گذشتہ روز وائس چانسلر اسلامیہ یونیورسٹی آف بہاولپور انجینئر پروفیسر ڈاکٹر اطہر محبوب نے بہاولپور چیمبر آف کامرس اینڈ انڈسٹری کا وزٹ کیا ۔ ان کے ہمراء پرو وائس چانسلر ڈاکٹر نوید اختر، مختلف فیکلٹی کے ڈینز ، پروفیسرز ، ڈائریکٹر ز، لیکچرارز ، ڈائریکٹر پبلک رلیشن اور ڈائریکٹر فنڈ ریزنگ موجودتھے۔وزٹ کا بنیادی مقصد بہاولپور چیمبر آف کامرس اینڈ انڈسٹری کے حالیہ انتخابات میں بلا مقابلہ منتخب ہو کر آنے والے اعلیٰ عہدیداران اور اراکین ایگزیکٹو کمیٹی کو مبارک باد دینا تھا۔ اس موقع پر بہاولپور چیمبر آف کامرس اینڈ انڈسٹری کے صدر حافظ محمد یونس، سینئر نائب صدر احمد علی جبار، نائب صدر منصور احمد ، اراکین ایگزیکٹو کمیٹی ، سابق صدور جن میں چوہدری عبد الجبار ، سیٹھ محمد ارشد، تنویر محمود اور دیگر اراکین چیمبر بھی موجود تھے۔وائس چانسلر اسلامیہ یونیورسٹی نے چیمبر کے نو منتخب اعلیٰ عہدیداران اور دیگر اراکین ایگزیکٹو کمیٹی کو بلا مقابلہ منتخب ہونے پر مبارک باد پیش کی اور تمام اراکین کو پھولوں کے گلدستے پیش کیے۔اس موقع پر انہوں نے کہا کہ اسلامیہ یونیورسٹی بہاولپور کے طلباء کی تعداد میں مسلسل اضافہ ہو رہا ہے اور جامع وقت کے تقاضوں کے مطابق بہترین منصوبوں پر کام کر رہی ہے اور عالمی رینکنگ میں بھی یونیورسٹی مسلسل ترقی کر رہی ہے اور کئی اہم بڑے منصوبے بھی شروع کیے ہیں۔غریب مستحق اور نادار طلباء کے بارے میں انہوں نے بتایا کہ ہم ایسے طلباء و طالبات کی سہولت کے لیے سکالر شپ کے ساتھ ساتھ ان کی فیسوں میں بھی کمی کر رہے ہیں ۔ انہوں نے کہا کہ اسلامیہ یونیورسٹی اور بہاولپور چیمبر آف کامرس اینڈ انڈسٹری کے مابین درینہ اور خوشگوار تعلقات قائم ہیں اور مختلف شعبوں میں مل کر کام کر رہے ہیں۔قبل ازیں بہاولپو رچیمبر آف کامرس کے صدر حافظ محمد یونس نے وائس چانسلر کی چیمبر آمد پر ان کا والہانہ استقبال کیا ۔ صدر چیمبر نے وائس چانسلر اسلامیہ یونیورسٹی اور ان کے وفد کا چیمبر کے عہدیداران کو مبارک باد دینے پر خصوصی شکریہ ادا کیا ۔اس موقع پر چیمبر کے سابق صدر چوہدری عبد الجبار نے بھی اسلامیہ یونیورسٹی کے وفد کے دورہ بہاولپور چیمبر پر ان کا شکریہ ادا کیا اور کہا کہ چیمبر اور یونیورسٹی انتظامیہ کے مابین تعلقات پر ہمیں خوشی ہے اور امید ہے کہ یہ خوشگوار تعلقات ہمیشہ قائم رہیں گے۔تقریب کے آخر میں مہمانوں کے اعزاز میں پر تکلف ظہرانے کا اہتمام کیا گیا اور وائس چانسلر کے اعزاز میں چیمبر کی یاد گاری شیلڈ پیش کی گئی۔