ملک میں مہنگائی کی شرح میں گزشتہ ہفتے کے دوران 0.48 فیصد کمی ریکارڈ کی گئی، پیاز، ٹماٹر، چکن، ایل پی جی، چینی ، انڈوں اور آٹے سمیت 11 ضروری اشیاء کی قیمتوں میں کمی ہوئی،ادارہ برائے شماریات

اسلام آباد۔(عاقب ابراہیم غوری سے ):ملک میں مہنگائی کی شرح میں گزشتہ ہفتے کے دوران 0.48 فیصد کمی ریکارڈ کی گئی ہے، ہفتہ رفتہ میں 11 ضروری اشیاء کی قیمتوں میں کمی اور 19 کی قیمتوں میں استحکام رہا۔ ادارہ برائے شماریات پاکستان کی طرف سے افراط زر کے بارے میں جاری ہفتہ وار رپورٹ کے مطابق 2 دسمبر کو ختم ہونے والے ہفتے میں پیاز کی قیمت میں 7.74 فیصد، ٹماٹر کی قیمت 16.57 فیصد، چکن 7.68، ایل پی جی 2.43، چینی 1.51، انڈے 1.43، سرخ مرچ پائوڈر 0.88، آلو 0.67، آٹا 0.58، گڑ 0.45 اور لہسن کی قیمت میں 0.29 فیصد کی کمی ریکارڈ کی گئی۔ ہفتہ رفتہ میں 21 اشیاء کی قیمتوں میں اضافہ ریکارڈ کیا گیا۔

ان میں کیلا کی قیمت میں 3.82 فیصد، دال مسور 2.60 فیصد، دال ماش 2.26 فیصد، دال مونگ 2.10 فیصد، کوکنگ آئل (پانچ لیٹر) 1.95 فیصد، واشنگ سوپ 1.80 فیصد اور بناسپتی گھی (ایک کلوگرام) کی قیمت میں 1.44 فیصد کا اضافہ ہوا۔ سالانہ بنیادوں پر پیاز کی قیمت میں 37.63 فیصد، دال مونگ 26.88 فیصد، آلو 20.08 فیصد، ٹماٹر 17.45 فیصد اور چکن کی قیمت میں 2.05 فیصد کی کمی ریکارڈ کی گئی ہے۔

سب سے کم 17732 روپے ماہوار آمدنی والے گروپ کے لیے قیمتوں کے حساس اشاریہ میں 0.47 فیصد کی کمی ریکارڈ کی گئی، 17733 روپے سے لے کر 22888 روپے، 22889 روپے سے لے کر 29517 روپے، 29518 سے لے کر 44175 روپے اور اس سے زیادہ ماہوار آمدنی رکھنے والے گروپوں کے لیے قیمتوں کے حساس اشاریہ میں بالترتیب 0.50 فیصد، 0.47 فیصد، 0.48 فیصد اور 0.47 فیصد کی کمی ریکارڈ کی گئی۔

قیمتوں کے حساس اشاریہ کا تعین ملک کے 17 شہروں کی پچاس مارکیٹوں میں 51 ضروری اشیاء کی قیمتوں میں ردوبدل کی بنیاد پر کیا جاتا ہے۔