عالمی مارکیٹ میں خام تیل کی قیمت میں اضافہ، 100 ڈالر فی بیرل کی حد کراس کر گیا

نیو یارک (عاقب غوری سے ) – عالمی مارکیٹ میں خام تیل کی قیمتوں میں اتار چڑھاؤ جاری ہے۔ خام تیل کی قیمت میں معمولی اضافہ کے بعد دوبارہ 100 ڈالر فی بیرل کی حد کراس کر گیا۔

عالمی مارکیٹ میں امریکی خام تیل  تقریبا ایک ڈالر کے اضافہ کے بعد فی بیرل 96 ڈالر، 79سینٹ کا ہو گیا جبکہ برطانوی خام تیل کی ایک بیرل تیل کی قیمت 100ڈالر، 20سینٹ ریکارڈ کی گئی۔

عالمی مارکیٹ میں  سونے  چاندی ،کاپر  اور پلاٹینیم کے نرخ   ایک  فیصد  تک گر گئے۔ سونے کی فی اونس قیمت ایک ہزار، 728 ڈالر فی اونس، چاندی 19 ڈالر میں فروخت ہوئی جبکہ تانبے  کی فی گرام قیمت 3.30 ڈالر اور پلا ٹینم کی فی اونس قیمت  831 ڈالر ہوگئی ۔

مہنگائی کے باعث طلب میں کمی آنے سے ملائیشین پام آئل فی ٹن 65ڈالر سستا ہو گیا جس کے بعد اس کی فی ٹن قیمت 867ڈالر پر آگئی۔

عالمی  مارکیٹ میں گندم کی فی ٹن قیمت  3 یوروکے اضافے  سے 344.25  یورو  جبکہ  سویا بین کی فی بشل قیمت   0.7 ڈالرکے اضافے  سے16 ڈالر ریکارڈ  کی گئی۔

مہنگائی کی بلند ترین شرح سے امریکی حصص مارکیٹ گر گئی ۔ ڈاؤ انڈیکس208، ایس اینڈ پی 500انڈیکس 17پوائنٹ کی کمی پر بند ہوا۔

یورپی حصص بازاروں پر نظر ڈالیں تو وہاں بھی مندی نظر آتی ہے۔ ڈیکس انڈیکس میں 1.16 فیصد ، ایف ٹی ایس ای انڈیکس میں  0.74 فیصد  جبکہ سی اےسی انڈیکس میں  0.73 فیصد  کمی ریکارڈ کی گئی۔

ادھر کینیڈا کے مرکزی بینک نے شرح سود میں 100بیسس پوائنٹ کا بڑا  اضافہ کردیا ،شرح سود میں اضافہ گزشتہ 24 برس میں سب سے زیادہ ہے ۔ کینیڈا میں مہنگائی کی شرح 8 فیصد کی بلند ترین سطح پر ہے۔