لوگوں کی بڑی تعدادمری پہنچ گئی، پولیس اورانتظامیہ ٹریفک کنٹرول کرنے میں ناکام
مری:(علی رضا سے ) لاپرواہی اور بے احتیاطی کا ثبوت دیتے ہوئے لوگوں کی ایک مرتبہ پھر بڑی تعداد مری پہنچ گئی ہے جب کہ پولیس اور مقامی انتظامیہ ٹریفک کو کنٹرول کرنے میں ناکام ہو گئی ہے۔
منٹوں کا فاصلہ گھنٹوں میں طے ہونے لگا ہے، شہریوں و سیاحوں کو سخت دشواری کا سامنا کرنا پڑ رہا ہے جب کہ سینکڑوں گاڑیوں میں ٹریفک جام کے باعث پیٹرول ختم ہونے کا خدشہ پیدا ہو گیا ہے جو ٹریفک کی روانی میں مزید رکاوٹ پیدا کرنے کا سبب بھی بن سکتا ہے۔ مال روڈ سمیت تمام سیاحتی مقامات پر بے پناہ رش ہے۔
واضح رہے کہ گزشتہ سال سردیوں کے موسم میں بھیانک ٹریفک جام ہوا تھا جو المناک سانحے میں تبدیل ہو گیا تھا۔
وزیراعلیٰ پنجاب چودھری پرویز الہٰی نے مری میں ٹریفک کی روانی کو بہتر بنانے کا حکم دیتے ہوئے کمشنر راولپنڈی اور آرپی او راولپنڈی کو ہدایات جاری کردی ہیں۔
وزیراعلیٰ پنجاب نے کہا ہے کہ مری میں ٹریفک رواں دواں رکھنے کیلئے تمام ضروری اقدامات اٹھائے جائیں، سی ٹی او راولپنڈی فی الفور مری پہنچیں، انتظامیہ اورٹریفک حکام مل کرمؤثرٹریفک مینجمنٹ پلان پر عملدرآمد یقینی بنائیں، سینئرپولیس و انتظامی افسران خود فیلڈ میں رہ کر ٹریفک انتظامات کو بہتر بنائیں۔
وزیراعلیٰ پنجاب چودھری پرویز الہٰی نے واضح طور پر ہدایات دی ہیں کہ تعین کردہ حد سے زائد گاڑیوں کو مری میں داخلے کی قطعاً اجاز ت نہ دی جائے، سیاحوں کی آمد ورفت کو مؤثر ٹریفک مینجمنٹ کے ذریعے ریگولیٹ کیا جائے اور بہترین ٹریفک مینجمنٹ کر کے سیاحوں کو سہولت فراہم کی جائے۔
