کورین وفد کی گورنرپنجاب سےملاقات،باہمی دلچسپی کے امورپر تبادلہ خیال

لاہور(یوتھ ویژن نیوز )گورنر پنجاب محمد بلیغ الرحمن سے آج یہاں گورنر ہائوس لاہور میں کورین وفد کی سابق سفیر سونگ جونگ ہوان (Song Jong Hwan) کی قیادت میں ملاقات کی۔

ملاقات میں پاکستان کے جنوبی کوریا میں اعزازی انویسٹمنٹ کونسلر مدثر اقبال بھی وفد کے ہمراہ تھے ۔ ملاقات کے دوران باہمی دلچسپی کے اموردوطرفہ تعلقات بڑھانے اور مختلف شعبوں بالخصوص تجارت اور ٹورازم کو فروغ دینے کے حوالے سے تبادلہ خیال کیا گیا۔
اس موقع پر گفتگو کرتے ہوئے گورنر پنجاب محمد بلیغ الرحمن نے کہا کہ پاکستان کوریا کے ساتھ اپنے خوشگوار تعلقات کو قدر کی نگاہ سے دیکھتا ہے۔انہوں نے کہا کہ دنیا کی کامیاب ترین معیشتوں سے دوطرفہ تعلقات کو فروغ دینا اور ان کے تجربات سے استفادہ کرنا ہماری حکمت عملی کا اہم پہلو ہے۔ انہوں نے کہا عالمی محولیاتی تبدیلیوں کی وجہ سے بہت سے ممالک متاثر ہوئے ہیں اور ان حالات میں کوئی بھی ملک تنہا آگے نہیں بڑھ سکتا۔ گورنر پنجاب نے کہا کہ کوریا کی اقتصادی ترقی بہت سے ملکوں کے لئے بہترین مثال ہے اور پاکستان کوریا سے اقتصادی اور تجارتی تعاون کو فروغ دیتے ہوئے معاشی ترقی کے اہداف حاصل کرنا چاہتا ہے۔گورنر پنجاب نے کہا کہ دونوں ممالک کے درمیان سیاحت کے شعبے میں تعلقات کو فروغ دینے کی ضرورت ہے بالخصوص بدھا ٹورازم کو فروغ دینے کے لیے وسیع امکانات موجود ہیں۔ انہوں نے کہا کہ پاکستان میں گندھارا تہذیب اور بدھا کی یادگاریں موجود ہیں۔گورنر پنجاب نے وفد کو بتایا کہ گورنر ہاس میں ایک بدھا پیالہ بھی موجود ہے اور اس کی تاریخی اہمیت سے آگاہ کیا۔گورنر پنجاب نے مزید کہا کہ دونوں ممالک کے درمیان ثقافتی سطح پر بھی وفود کے تبادلے ہونے چاہئیں اس سے ایک دوسرے کی ثقافت سے آگاہی ملے گی اور دونوں ملکوں کے درمیان عوامی رابطے مضبوط ہوں گے ۔
اس موقع پر گورنر پنجاب محمد بلیغ الرحمن نے سابق سفیر سونگ جونگ ہوان (Song Jong Hwan) کی پاکستان میں خدمات کو بھی سراہا۔ اُنہوں نے کہا کہ پاکستان اور کوریا کے درمیان تعلقات کو مزیدمستحکم کرنے اور مختلف شعبوں کے فروغ میں سابق کورین سفیر کا کلیدی کرداررہا ہے۔
کورین وفد کی جانب سے زراعت، پیسٹی سائڈ, فوڈ پیکجنگ، ٹورازم اور سپورٹس میں تعاون بڑھانے میں دلچسپی کا اظہار کیا گیا۔