امریکہ کی ایران پر ممکنہ حملے کی تیاری، کشیدگی بڑھنے کا خدشہ :خیبر ایجینسی
یوتھ ویژن نیوز : غیرملکی خبرایجنسی رائٹرز نے رپورٹ میں دعویٰ کیا ہے کہ امریکی فوج صدر ڈونلڈ ٹرمپ کے حکم پر ایران کے خلاف ہفتوں پر محیط ممکنہ طویل جنگ کی تیاری کر رہی ہے، جو دونوں ممالک کے درمیان ماضی کے مقابلے میں بدترین کشیدگی پیدا کرسکتی ہے۔
ایران اور امریکہ کے درمیان کشیدگی کے خدشات
رپورٹ میں بتایا گیا کہ امریکی عہدیداروں نے منصوبے کی حساسیت کے پیش نظر اپنی شناخت ظاہر نہ کرنے کی شرط رکھی۔ عہدیداروں کے مطابق فوج کی تیاریوں میں ایران کی جوہری تنصیبات، ریاستی ادارے اور سلامتی کی اہم تنصیبات کو نشانہ بنانے کا امکان شامل ہے، تاہم مخصوص تفصیلات فراہم نہیں کی گئیں۔
عہدیداروں نے اس اقدام کو ایران اور امریکہ کے درمیان جاری سفارتی کوششوں کے لیے خطرہ قرار دیا اور بتایا کہ دونوں جانب سے جوابی حملوں اور انتقامی کارروائیوں کا سلسلہ شروع ہوسکتا ہے، جس سے خطے میں مزید کشیدگی پیدا ہونے کا خدشہ ہے۔
رائٹرز کے سوال پر وائٹ ہاؤس کی ترجمان اینا کیلی نے کہا کہ صدر ٹرمپ نے ایران کے حوالے سے تمام آپشنز کھلے رکھے ہیں اور کسی بھی مسئلے پر فیصلہ ملکی اور قومی سلامتی کے بہترین مفاد کے مطابق کیا جائے گا۔ انہوں نے اس بات پر زور دیا کہ حتمی فیصلہ ملک کے تحفظ اور مفادات کو دیکھ کر کیا جائے گا، تاہم انہوں نے کسی خاص تاریخ یا حملے کی تفصیل دینے سے انکار کیا۔
ماہرین کے مطابق اگر یہ منصوبہ عملی شکل اختیار کرتا ہے تو خطے میں فوجی اور سیاسی تناؤ میں اضافہ ہوگا اور عالمی سطح پر امریکہ اور ایران کے تعلقات مزید پیچیدہ ہو سکتے ہیں۔
