سیکیورٹی صورتحال کے باعث یو اے ای میں پاکستانی سفارتخانے کی سروسز بند
یوتھ ویژن نیوز : (گلف نیوز ڈسک) متحدہ عرب امارات میں سیکیورٹی صورتحال کے پیش نظر پاکستانی سفارتخانہ نے اپنے تمام بالمشافہ قونصلر سروسز تاحکمِ ثانی معطل کرنے کا اعلان کردیا ہے۔ سفارتخانے کی جانب سے جاری کردہ سرکلر میں کہا گیا ہے کہ یہ فیصلہ مکمل طور پر احتیاطی تدبیر کے طور پر کیا گیا ہے تاکہ پاکستانی کمیونٹی اور سفارتی عملے کی حفاظت کو یقینی بنایا جا سکے۔
سفارتی ذرائع کے مطابق سروسز کی معطلی عارضی نوعیت کی ہے اور صورتحال معمول پر آنے کے بعد بحالی سے متعلق معلومات سرکاری ذرائع کے ذریعے بروقت فراہم کی جائیں گی۔ پاکستانی شہریوں کو ہدایت کی گئی ہے کہ وہ افواہوں پر کان نہ دھریں اور صرف مستند سرکاری اعلانات پر انحصار کریں، جبکہ مقامی حکام کی جاری کردہ ہدایات پر مکمل عمل درآمد کو بھی ضروری قرار دیا گیا ہے۔
مزید پڑھیں: یو اے ای کی پاکستان کو 2 ارب ڈالر ڈیپازٹس رول اوور کی یقین دہانی
سفارتخانے کے بیان میں متحدہ عرب امارات کی وزارت کی جانب سے جاری کردہ ایڈوائزری کا حوالہ بھی دیا گیا، جس میں نجی شعبے کو عارضی طور پر ریموٹ ورک اپنانے اور کھلے مقامات پر غیر ضروری موجودگی سے گریز کرنے کی ہدایت کی گئی ہے۔ اس اقدام کا مقصد علاقائی کشیدگی کے تناظر میں انسانی جانوں کے تحفظ کو یقینی بنانا بتایا گیا ہے۔
بیان کے مطابق ہنگامی حالات میں پاکستانی شہریوں کی معاونت کے لیے سفارتخانے نے رابطہ نمبرز بھی جاری کیے ہیں، جن کے ذریعے کمیونٹی کو فوری رہنمائی فراہم کی جائے گی۔ حکام کا کہنا ہے کہ کسی بھی غیر معمولی صورتحال میں سفارتخانہ متحرک رہے گا اور پاکستانی شہریوں کو تنہا نہیں چھوڑا جائے گا۔
دوسری جانب اماراتی حکام نے واضح کیا ہے کہ نجی شعبے کے آجروں کو اختیار دیا گیا ہے کہ وہ مقامی صورتحال کے مطابق فیصلے کریں۔ وزارتِ انسانی وسائل کے مطابق جہاں ممکن ہو وہاں ریموٹ ورک کو ترجیح دی جائے، جبکہ صرف ضروری نوعیت کی ملازمتوں میں جسمانی حاضری کو برقرار رکھا جائے۔ یہ ہدایات محدود مدت کے لیے جاری کی گئی ہیں اور آئندہ فیصلے صورتحال کی پیش رفت کو مدنظر رکھتے ہوئے کیے جائیں گے۔
حکام نے تمام غیر ملکی کمیونٹیز، بشمول پاکستانی شہریوں، پر زور دیا ہے کہ وہ وفاقی اور مقامی سطح پر جاری ہونے والی سرکاری معلومات سے باخبر رہیں اور کسی بھی ہنگامی صورتِ حال میں ذمہ دارانہ طرزِ عمل اختیار کریں۔
