وزیراعظم شہباز شریف کی محمد بن سلمان سے ملاقات، ایران امریکا مذاکرات پر مشاورت

یوتھ ویژن نیوز : (ثاقب ابراہیم سے) وزیراعظم محمد شہباز شریف نے سعودی عرب کے شہر جدہ میں ولی عہد شہزادہ محمد بن سلمان سے اہم ملاقات کی، جس میں پاکستان اور سعودی عرب کے دوطرفہ تعلقات، خطے کی بدلتی صورتحال اور ایران امریکا مذاکرات کے حالیہ سفارتی عمل پر تفصیلی تبادلہ خیال کیا گیا۔ یہ ملاقات وزیراعظم کے تین ملکی دورے کے پہلے مرحلے میں ہوئی۔

جدہ میں قصر اسلام پہنچنے پر سعودی ولی عہد محمد بن سلمان نے وزیراعظم شہباز شریف کا پرتپاک استقبال کیا۔ سرکاری ذرائع کے مطابق ملاقات میں دونوں رہنماؤں نے باہمی تعاون، علاقائی امن و استحکام اور موجودہ سفارتی پیش رفت پر مشاورت کی۔

ایران امریکا مذاکرات پر اہم گفتگو

ملاقات کے دوران دونوں رہنماؤں نے ایران اور امریکا کے درمیان جاری مذاکراتی عمل پر بھی گفتگو کی۔ ذرائع کے مطابق خطے میں کشیدگی کے خاتمے، جنگ بندی کے استحکام اور آئندہ سفارتی پیش رفت کے امکانات پر تبادلہ خیال کیا گیا۔

تجزیہ کار اس ملاقات کو مشرق وسطیٰ میں تیزی سے بدلتی صورتحال کے تناظر میں اہم قرار دے رہے ہیں، خاص طور پر ایسے وقت میں جب پاکستان، سعودی عرب اور دیگر علاقائی ممالک سفارتی ہم آہنگی بڑھا رہے ہیں۔

اعلیٰ سطحی وفد بھی ہمراہ

وزیراعظم کے ہمراہ نائب وزیراعظم و وزیر خارجہ اسحاق ڈار، وزیر اطلاعات عطا اللہ تارڑ، معاون خصوصی سید طارق فاطمی اور غیر ملکی میڈیا کے لیے ترجمان مشرف زیدی بھی موجود ہیں۔

قبل ازیں جدہ ایئرپورٹ پر نائب گورنر مکہ ریجن سعود بن مشعال بن عبدالعزیز، پاکستان میں سعودی سفیر نواف بن سعید المالکی اور سعودی عرب میں پاکستان کے سفیر احمد فاروق نے وزیراعظم اور وفد کا استقبال کیا۔

قطر اور ترکیہ کا اگلا مرحلہ

وزیراعظم شہباز شریف اپنے دورے کے اگلے مرحلے میں قطر جائیں گے جبکہ 17 اپریل کو ترکیہ میں انطالیہ کانفرنس میں بھی شرکت کریں گے، جہاں علاقائی سلامتی اور سفارت کاری اہم موضوعات ہوں گے۔