بلدیاتی انتخابات 2025: 2433 امیدوار 642 وارڈز میں میدان میں آگئے
یوتھ ویژن نیوز : بلدیاتی انتخابات2025 کے لیے 2433 امیدوار 642 وارڈز میں میدان میں ہیں، الیکشن کمیشن نے تمام تیاریاں مکمل کر لیں۔
صوبائی دارالحکومت کوئٹہ میں بلدیاتی انتخابات 28 دسمبر 2025 کو طویل تاخیر کے بعد منعقد ہونے جا رہے ہیں جن کے لیے الیکشن کمیشن بلوچستان نے تمام انتظامات مکمل کر لیے ہیں اور شہر بھر میں انتخابی سرگرمیاں عروج پر پہنچ چکی ہیں۔
کوئٹہ میٹروپولیٹن کارپوریشن کی 172 یونین کونسلوں کے 642 وارڈز میں مجموعی طور پر 2 ہزار 433 امیدوار جنرل کونسلر کی نشستوں کے لیے میدان میں ہیں جبکہ شہر کو انتظامی طور پر زرغون، چلتن، سریاب اور تکتو ٹاؤن میں تقسیم کیا گیا ہے جہاں زرغون ٹاؤن میں 46 نشستوں پر 730 امیدوار، چلتن ٹاؤن میں 46 نشستوں پر 500 امیدوار، سریاب ٹاؤن میں 38 نشستوں پر 339 امیدوار اور تکتو ٹاؤن میں 42 نشستوں پر 804 امیدوار ایک دوسرے کے مدِ مقابل ہوں گے۔
سب سے سخت مقابلہ تکتو ٹاؤن میں دیکھا جا رہا ہے جہاں اوسطاً ایک نشست کے لیے 19 امیدوار حصہ لے رہے ہیں، جبکہ زرغون ٹاؤن میں بھی بھرپور انتخابی ماحول جاری ہے۔ الیکشن کمیشن کے مطابق پولنگ کے دن شہر میں 642 پولنگ اسٹیشنز اور 2 ہزار 113 پولنگ بوتھ قائم کیے جائیں گے، جن میں حساس اسٹیشنز پر سی سی ٹی وی کیمرے، فوج اور ایف سی کی اضافی نفری تعینات ہو گی۔ شہر میں بلدیاتی الیکشن کے حوالے سے غیر معمولی جوش و خروش پایا جا رہا ہے اور تمام سیاسی جماعتیں بھرپور انتخابی مہم چلا رہی ہیں۔
