وزیراعظم شہباز شریف کا تین ملکی کرکٹ سیریز کی ٹیموں کے اعزاز میں ظہرانہ

یوتھ ویژن نیوز: (ثاقب ابراہیم سے) اسلام آباد میں وزیراعظم ہاؤس اس وقت کرکٹ کے رنگ میں رنگ گیا جب وزیراعظم محمد شہباز شریف نے ٹرائی نیشن سیریز میں شریک پاکستان، سری لنکا اور زمبابوے کی قومی کرکٹ ٹیموں کے اعزاز میں خصوصی ظہرانہ دیا،جس میں اعلیٰ حکومتی شخصیات، سفارتی نمائندگان اور کرکٹ حکام نے بھی شرکت کی۔

وزیراعظم نے اس موقع پر خطاب کرتے ہوئے کہا کہ پاکستان میں بین الاقوامی کرکٹ کا تسلسل، ملک کے مثبت تشخص، امن اور مجموعی استحکام کا واضح ثبوت ہے اور یہ اس بات کا پیغام دیتا ہے کہ پاکستان کھیلوں کے عالمی مقابلوں کی میزبانی کے لیے مکمل طور پر تیار اور پُرامن ملک ہے۔

انہوں نے کہا کہ سہ ملکی کرکٹ سیریز کے ذریعے شائقین کو اعلیٰ درجے کا کھیل دیکھنے کو ملا اور میدانوں میں شاندار مقابلوں نے نہ صرف کرکٹ کی رونق بحال کی بلکہ نوجوان نسل میں کھیل کے فروغ کے لیے نئی امیدیں بھی جگائیں۔ وزیراعظم نے کہا کہ پاکستان، سری لنکا اور زمبابوے کی ٹیموں نے جس جذبے، محنت، مہارت اور اسپورٹس مین اسپرٹ کا مظاہرہ کیا وہ قابل ستائش ہے اور ہر کھلاڑی نے اپنے ملک کی شاندار نمائندگی کرتے ہوئے بہترین پیشہ ورانہ کارکردگی دکھائی۔ انہوں نے کہا کہ کھلاڑی باہمی احترام، برداشت اور مثبت رویوں کے ذریعے نوجوان نسل کے لیے مشعل راہ بنیں اور کرکٹ کے ذریعے دوستی، امن اور ہم آہنگی کا پیغام دنیا بھر تک پہنچائیں۔

شہباز شریف نے کہا کہ چیئرمین محسن نقوی کی سربراہی میں پاکستان کرکٹ بورڈ نے اس سیریز کے تمام انتظامات انتہائی اعلیٰ معیار، پیشہ ورانہ حکمت عملی اور منظم تیاری کے ساتھ مکمل کیے، جس کی بدولت نہ صرف میچز بخوبی منعقد ہوئے بلکہ مہمان ٹیموں کو بھی ایک بہترین کرکٹنگ ماحول فراہم کیا گیا۔ انہوں نے امید ظاہر کی کہ تینوں ممالک کے درمیان کرکٹ کے ذریعے دوستی، سفارتی تعاون اور باہمی روابط مزید مضبوط ہوں گے، جبکہ پاکستان آئندہ بھی دنیا بھر کی ٹیموں کو اسی گرمجوشی اور بہترین انتظامات کے ساتھ خوش آمدید کہتا رہے گا۔

وزیراعظم نے کہا کہ پاکستان کا مقصد کھیلوں کے ذریعے عالمی دنیا میں امن اور مثبت شناخت قائم کرنا ہے، اور اس سلسلے میں کرکٹ نہایت اہم کردار ادا کرتی ہے۔ تقریب میں وفاقی وزراء عطا اللہ تارڑ، محسن رضا نقوی، محمد حنیف عباسی، سری لنکا اور زمبابوے کے ہائی کمشنرز، سفارتی حکام، پی سی بی کے نمائندگان اور مختلف محکموں کے اعلیٰ افسران بھی شریک ہوئے۔ شرکاء نے اس موقع پر وزیراعظم کے کرکٹ دوستانہ اقدامات کو سراہا اور کہا کہ اس قسم کی تقاریب نہ صرف کھیل کی حوصلہ افزائی کرتی ہیں بلکہ پاکستان کی بین الاقوامی سطح پر مثبت تصویر کو مزید مضبوط کرتی ہیں۔ ظہرانے کے دوران ٹیموں کے کھلاڑیوں نے وزیراعظم سے گفتگو بھی کی، جبکہ کرکٹ کی اہمیت، نوجوانوں کی دلچسپی اور کھیلوں کے عالمی رجحانات پر بھی تبادلہ خیال کیا گیا۔ تقریب کے اختتام پر وزیراعظم نے امید ظاہر کی کہ ٹرائی نیشن سیریز پاکستان کے لیے کھیل اور سفارتکاری دونوں میدانوں میں ایک مثبت سنگِ میل ثابت ہوگی اور آئندہ برسوں میں مزید ممالک پاکستان میں کرکٹ کھیلنے کے لیے آئیں گے۔