وزیراعظم شہباز شریف 2 روزہ سرکاری دورے پر ترکمانستان پہنچ گئے

یوتھ ویژن نیوز : (ثاقب ابراہیم سے) وزیراعظم شہباز شریف دو روزہ سرکاری دورے پر ترکمانستان پہنچ گئے، صدر سے اہم ملاقات اور عالمی فورم میں شرکت کریں گے۔

وزیراعظم محمد شہباز شریف دو روزہ سرکاری دورے پر صدر سردار بردی محمدوف کی دعوت پر اشک آباد پہنچ گئے، جہاں اشک آباد انٹرنیشنل ایئرپورٹ پر ترکمان کابینہ کے نائب چیئرمین اور ٹرانسپورٹ و مواصلات کے سربراہ محمد خان چیکیئف نے ان کا پرتپاک استقبال کیا جبکہ پاکستانی وفد بھی وزیراعظم کے ہمراہ موجود تھا۔

مزید یہ بھی پڑھیں : وزیرِ اعظم شہباز شریف دو روزہ سرکاری دورے پر ترکمانستان روانہ

دورے کے دوران وزیراعظم آج ترکمانستان کے صدر سے اہم دو طرفہ ملاقات کریں گے جس میں دونوں ممالک کے سیاسی و اقتصادی تعاون، علاقائی روابط اور تجارتی شراکت داری کو فروغ دینے پر گفتگو کی جائے گی جبکہ پاکستان اور ترکمانستان کے باہمی تعلقات کو مزید مضبوط بنانے کے لیے بھی مختلف پہلوؤں پر تبادلہ خیال ہوگا۔ وزیراعظم کل امن و اعتماد کے بین الاقوامی سال، عالمی دن برائے غیر جانبداری اور ترکمانستان کی مستقل غیر جانبداری کی 30ویں سالگرہ سے متعلق اشک آباد میں منعقدہ اعلیٰ سطحی فورم میں شرکت کریں گے۔ وفد میں نائب وزیراعظم و وزیر خارجہ سینیٹر اسحاق ڈار، وزیر بجلی سردار اویس لغاری، وزیر اطلاعات عطاء اللہ تارڑ اور معاونین خصوصی طارق فاطمی اور طلحہ برکی شامل ہیں۔