پاک چین تعلقات کی مضبوطی: ساتواں اسٹریٹجک ڈائیلاگ بیجنگ میں کامیابی سے مکمل

یوتھ ویژن نیوز :چینی وزیر خارجہ وانگ یی کی دعوت پر نائب وزیر اعظم و وزیر خارجہ سینیٹر محمد اسحاق ڈار نے بیجنگ کا دورہ کیا، جہاں انہوں نے پاکستان اور چین کے وزرائے خارجہ کے ساتویں اسٹریٹجک ڈائیلاگ کی مشترکہ صدارت کی۔

اس دوران دونوں ممالک نے دوطرفہ تعلقات کے تمام پہلوؤں کا جامع جائزہ لیا اور علاقائی و عالمی سطح پر اہم امور پر تفصیلی تبادلہ خیال کیا۔ ملاقات میں چین پاکستان اقتصادی راہداری (سی پیک)، تجارت، کثیرالجہتی تعاون اور عوامی روابط کے فروغ پر بھی بات چیت ہوئی، جس سے خطے میں تعاون اور ترقی کے نئے مواقع پیدا ہونے کی توقع ہے۔

دونوں رہنماؤں نے آل ویدر اسٹریٹجک کوآپریٹو پارٹنرشپ کی اہمیت پر زور دیا اور اس بات پر اتفاق کیا کہ پاکستان–چین دوستانہ تعلقات خطے میں امن، استحکام اور خوشحالی کے لیے کلیدی کردار ادا کرتے ہیں۔ مزید برآں، دوطرفہ اور کثیرالجہتی فورمز پر قریبی رابطہ کاری بڑھانے پر بھی اتفاق کیا گیا جبکہ پاکستان اور چین کے درمیان سفارتی تعلقات کی 75ویں سالگرہ کو شایانِ شان انداز میں منانے کا اعلان بھی کیا گیا، جس سے دونوں ممالک کے عوام میں دوستانہ روابط مزید مضبوط ہوں گے۔ یہ دورہ دونوں ممالک کے درمیان مستقبل میں وسیع تعاون اور سرمایہ کاری کے مواقع کو فروغ دینے میں سنگ میل ثابت ہو سکتا ہے۔