پاکستانی سفیر خلیل ہاشمی کی شاؤگوانگ ویجیٹیبل ایکسپو میں شرکت، اسمارٹ ایگریکلچر تعاون پر زور

یوتھ ویژن نیوز : (نیوز ڈسک) چین میں پاکستان کے سفیرخلیل ہاشمی نے صوبہ شیڈونگ کے شہر شاؤگوانگ میں منعقدہ 27ویں چین (شاؤگوانگ) انٹرنیشنل ویجیٹیبل سائنس اینڈ ٹیکنالوجی ایکسپو میں شرکت کی، جہاں پاکستان کو مہمان ملکِ خصوصی کا درجہ دیا گیا، یہ موقع پاکستان چین تعلقات کی 75ویں سالگرہ کے تناظر میں مزید اہمیت اختیار کر گیا۔

اسمارٹ ایگریکلچر اور جدید زرعی ٹیکنالوجی پر تبادلہ خیال

دورے کے دوران سفیر پاکستان نے شاؤگوانگ کی جدید زرعی صنعت، اسمارٹ گرین ہاؤس ٹیکنالوجی اور مربوط ویلیو چینز کا مشاہدہ کیا، اور پاکستان میں زرعی جدیدیت، سرمایہ کاری اور ٹیکنالوجی منتقلی کی ضرورت پر زور دیا، اس موقع پر دونوں جانب سے اسمارٹ ایگریکلچر پائلٹ منصوبوں پر بات چیت ہوئی۔

پاکستان نیشنل پویلین کا افتتاح اور تجارتی مواقع

سفیر خلیل ہاشمی نے ایکسپو میں پاکستان نیشنل پویلین کا افتتاح کیا، جسے پاکستان چین دوستی کی علامت قرار دیا گیا، پویلین میں پاکستانی مصنوعات جیسے پنک سالٹ، باسمتی چاول، پائن نٹس اور دستکاری کی نمائش کی گئی، جس کا مقصد تجارتی روابط اور برآمدات کو فروغ دینا تھا۔

چینی کمپنیوں کو پاکستان میں سرمایہ کاری کی دعوت

ایکسپو سے خطاب میں سفیر پاکستان نے چینی کمپنیوں کو پاکستان میں گرین ہاؤس ٹیکنالوجی، پائیدار فوڈ سسٹمز، جدید آبپاشی اور کولڈ چین لاجسٹکس میں سرمایہ کاری کی دعوت دی، انہوں نے شاؤگوانگ کے زرعی ماڈل کو پاکستان کے لیے ایک قابل تقلید مثال قرار دیا۔

زرعی تعاون اور مستقبل کی شراکت داری

سفیر پاکستان نے دونوں ممالک کے درمیان زرعی ماہرین کے تبادلے، مشترکہ سمپوزیم اور ٹیکنالوجی تعاون کے فروغ پر زور دیا، ماہرین کے مطابق یہ دورہ پاکستان اور چین کے درمیان جدید، پائیدار اور ٹیکنالوجی پر مبنی زرعی تعاون کو مزید مضبوط بنانے کی سمت ایک اہم قدم ہے۔