وزیراعظم کی زیرِ صدارت قومی اقتصادی کونسل کا اجلاس، قومی ترقیاتی بجٹ کی منظوری

یوتھ ویژن نیوز : (اسلام آباد) – وزیراعظم شہباز شریف کی زیرِ صدارت قومی اقتصادی کونسل (NEC) کا اجلاس منعقد ہوا، جس میں آئندہ مالی سال 2026-27 کے لیے قومی ترقیاتی بجٹ کی منظوری دے دی گئی۔ اجلاس میں وفاق اور صوبوں کے سالانہ ترقیاتی بجٹ (ADP) کو بھی منظوری دی گئی، جبکہ رواں مالی سال 2025-26 کے ترقیاتی بجٹ کا تفصیلی جائزہ بھی پیش کیا گیا۔

اس موقع پر صوبوں کے ترقیاتی منصوبوں پر بریفنگز اور پریزنٹیشنز دی گئیں۔ شرکاء نے آئندہ مالی سال کے پبلک سیکٹر انویسٹمنٹ پروگرام (PSIP) کا بھی جائزہ لیا، جبکہ رواں مالی سال کے پبلک سیکٹر انویسٹمنٹ پر بھی غور کیا گیا۔

ترقیاتی اسکیموں کی پیش رفت رپورٹ پیش کی گئی

یکم اپریل 2025 سے 31 مارچ 2026 کی مدت کے دوران ترقیاتی اسکیموں پر عملدرآمد کی پیش رفت رپورٹ (CDWP) پیش کی گئی۔ اسی عرصے میں اسکیموں کی ایگزیکٹو کمیٹی (ECNEC) اور دیگر متعلقہ فورمز سے منظوریوں کی رپورٹ بھی پیش کی گئی۔

اجلاس میں میگا منصوبوں کی نگرانی اور تشخیص (Monitoring & Evaluation) سے متعلق رپورٹ کی بھی منظوری دی گئی۔

اجلاس میں صوبائی وزرائے اعلیٰ کی شرکت

اس اہم اجلاس میں چاروں صوبوں کے وزرائے اعلیٰ، وزیراعظم آزاد کشمیر، اور دیگر اعلیٰ حکومتی شخصیات نے شرکت کی۔ اجلاس سے قبل وزیراعلیٰ خیبرپختونخوا سہیل آفریدی، وزیراعلیٰ سندھ مراد علی شاہ، وزیراعلیٰ بلوچستان مریم اورنگزیب، سیکریٹری خزانہ امداد اللہ بوسال اور رانا ثنااللہ وزیراعظم ہاؤس پہنچے۔