وزیراعظم کا ایف بی آر اصلاحات اور ٹیکس نظام مزید مؤثر بنانے کا فیصلہ

یوتھ ویژن نیوز : ( واصب ابراہیم سے)- وزیراعظم شہباز شریف کی ایف بی آر اصلاحات مزید تیز کرنے کی ہدایت، ٹیکس استعداد کے سائنسی تخمینے اور ڈیجیٹل نگرانی پر زور

اسلام آباد: وزیراعظم محمد شہباز شریف نے مختلف معاشی شعبوں میں ٹیکس استعداد کے درست تخمینے کے لیے جامع اور سائنسی طریقہ کار وضع کرنے کی ہدایت دیتے ہوئے کہا ہے کہ حکومت برآمدی اور مقامی صنعتوں کو ہر ممکن سہولت فراہم کرتی رہے گی، جبکہ ٹیکس نظام میں شفافیت، میرٹ اور ڈیجیٹلائزیشن کو مزید فروغ دیا جائے گا۔

یہ ہدایات وزیراعظم نے ایف بی آر اصلاحات سے متعلق ہفتہ وار جائزہ اجلاس کی صدارت کرتے ہوئے جاری کیں، جس میں محصولات میں اضافے، ادارہ جاتی اصلاحات اور ڈیجیٹل نگرانی کے نظام پر پیش رفت کا تفصیلی جائزہ لیا گیا۔

ٹیکس چوری کے خلاف مزید سخت اقدامات

وزیراعظم نے ہدایت کی کہ پاور سیکٹر کے تعاون سے غیر رسمی معاشی سرگرمیوں اور ٹیکس چوری میں ملوث افراد و کاروبار کی نشاندہی کرکے ان کے خلاف قانون کے مطابق کارروائی کی جائے تاکہ قومی محصولات میں اضافہ ممکن بنایا جا سکے۔

مزید صنعتوں میں ڈیجیٹل ٹریکنگ سسٹم

اجلاس میں بتایا گیا کہ چینی، سیمنٹ، تمباکو، ٹائلز اور کھاد کی صنعتوں میں ڈیجیٹل ٹریکنگ سسٹم مکمل طور پر فعال ہے، جبکہ ٹیکسٹائل، مشروبات، اسٹیل، پولٹری، خوردنی تیل و گھی اور ٹائرز سمیت مزید شعبوں میں اس نظام کو دسمبر تک نافذ کرنے کی تیاری مکمل کی جا رہی ہے۔

حکام کے مطابق ان اقدامات سے سیکڑوں ارب روپے کی اضافی ٹیکس استعداد کو قومی معیشت میں شامل کیا جا سکے گا۔

کاروباری برادری کو سہولتوں کی یقین دہانی

وزیراعظم نے ٹیکس قوانین کی پابندی کرنے والے افراد اور کاروباری اداروں کو قومی اثاثہ قرار دیتے ہوئے کہا کہ حکومت برآمدی اور مقامی صنعتوں کو ہر ممکن سہولت فراہم کرتی رہے گی تاکہ کاروباری سرگرمیوں اور سرمایہ کاری کو فروغ مل سکے۔

انہوں نے یہ بھی ہدایت کی کہ چیئرمین ایف بی آر اور سینئر افسران ہر ماہ کے پہلے ہفتے کراچی میں موجود ہوں تاکہ کاروباری برادری کے مسائل بروقت سنے اور حل کیے جا سکیں۔

ایف بی آر میں میرٹ اور شفافیت اولین ترجیح

وزیراعظم نے واضح کیا کہ ایف بی آر میں تقرریاں اور تبادلے صرف میرٹ کی بنیاد پر کیے جائیں گے۔ انہوں نے بہتر کارکردگی دکھانے والے افسران کی فہرست مرتب کرکے انہیں یوم آزادی کے موقع پر اعزازات دینے کی بھی ہدایت کی۔

اس کے ساتھ ہی کسٹمز بانڈڈ ویئر ہاؤسز کا فوری تھرڈ پارٹی آڈٹ اور ویلیڈیشن کرانے کا حکم بھی دیا گیا تاکہ بے ضابطگیوں کی بروقت نشاندہی اور اصلاح ممکن ہو سکے۔

اصلاحات سے محصولات میں اضافے کی توقع

اجلاس کو بریفنگ میں بتایا گیا کہ ایف بی آر میں ٹریننگ، پیئر ریویو، فیس لیس کسٹمز نظام، تھرڈ پارٹی آڈٹ اور متبادل تنازعاتی حل (ADCR) جیسے اصلاحاتی اقدامات کے مثبت نتائج سامنے آ رہے ہیں، جبکہ ٹیکس مقدمات میں غیر ضروری قانونی چارہ جوئی کم کرنے کے لیے نئی کیس اسکرونٹی کمیٹی بھی قائم کی جا رہی ہے۔

وزیراعظم شہباز شریف نے ہدایت کی کہ رواں سال کے اختتام تک پیداواری شعبوں میں ڈیجیٹل ٹریکنگ سسٹم کا مکمل نفاذ یقینی بنایا جائے تاکہ ٹیکس وصولیوں میں اضافہ، شفافیت اور معاشی استحکام کے حکومتی اہداف حاصل کیے جا سکیں۔