آپریشن غضب للحق، پاک فضائیہ کی بڑی کارروائی، قندھار میں اہم ٹھکانے تباہ

یوتھ ویژن نیوز : (ویب ڈسک)پاکستانی افواج نے آپریشن ” غضب للحق“ کے تحت چودہ اور پندرہ مارچ کی درمیانی شب افغانستان میں دہشت گردوں کے خلاف ایک بڑی فضائی کارروائی کرتے ہوئے متعدد اہم اہداف کو نشانہ بنایا جس کے بعد خطے میں سیکیورٹی صورتحال پر نئی بحث شروع ہو گئی ہے۔

سیکیورٹی ذرائع کے مطابق اس کارروائی میں پاک فضائیہ کے طیاروں نے انتہائی درستگی کے ساتھ دہشت گردوں کے ٹھکانوں کو نشانہ بنایا اور کارروائی کے دوران حاصل ہونے والی ویڈیو بھی جاری کر دی گئی ہے جس میں حملوں کے مناظر واضح طور پر دیکھے جا سکتے ہیں۔ ذرائع کے مطابق یہ کارروائی افغانستان کے شہر Kandahar کے مختلف علاقوں میں کی گئی جہاں مبینہ طور پر Taliban اور فتنہ الخوارج سے منسلک عناصر کے مراکز موجود تھے۔

بنوں دھماکہ: فتنہ الخوارج کے ذیلی گروہ ’اتحاد المجاہدین‘ نے حملے کا اعتراف کر لیا۔

سیکیورٹی ذرائع کا کہنا ہے کہ کارروائی کے دوران دہشت گردوں کے کئی اہم ٹھکانوں کو تباہ کیا گیا جبکہ بعض فوجی تنصیبات بھی نشانہ بنی جنہیں مبینہ طور پر دہشت گرد سرگرمیوں کے لیے استعمال کیا جا رہا تھا۔ ذرائع کے مطابق کارروائی انتہائی منصوبہ بندی کے ساتھ کی گئی تاکہ مخصوص اہداف کو ہی نشانہ بنایا جا سکے اور دیگر نقصانات سے بچا جا سکے۔

حکام کا کہنا ہے کہ اس کارروائی کا مقصد سرحد پار دہشت گردی کے مراکز کو ختم کرنا اور پاکستان کے اندر ہونے والی حالیہ دہشت گرد کارروائیوں کے ذمہ دار عناصر کے خلاف مؤثر اقدام کرنا تھا۔ دفاعی تجزیہ کاروں کے مطابق حالیہ فضائی کارروائی اس بات کی نشاندہی کرتی ہے کہ پاکستان اپنی قومی سلامتی کے لیے سرحد پار موجود خطرات کے خلاف سخت اقدامات کرنے کے لیے تیار ہے۔

ماہرین کے مطابق اس کارروائی کے بعد خطے میں سیکیورٹی صورتحال مزید حساس ہو سکتی ہے اور افغانستان اور پاکستان کے درمیان سیکیورٹی تعاون کے حوالے سے نئی سفارتی سرگرمیوں کا بھی امکان ظاہر کیا جا رہا ہے۔