سزا کے بعد عمران خان کا پہلا ردعمل، مسکراتے ہوئے اپیل دائر کرنے کی ہدایت

یوتھ ویژن نیوز : (مبشر بلوچ سے) سزا کے بعد عمران خان کا پہلا ردعمل، مسکراتے ہوئے اپیل دائر کرنے کی ہدایت

توشہ خانہ ٹو کیس میں سزا سنائے جانے کے بعد بانی پاکستان تحریکِ انصاف عمران خان کا پہلا ردعمل سامنے آ گیا ہے۔ ان کے وکیل بیرسٹر سلمان صفدر کے مطابق عمران خان فیصلے پر حیران نہیں تھے اور ملاقات کے دوران پُرسکون اور مطمئن دکھائی دیے، تاہم انہوں نے فوری طور پر ہائی کورٹ میں اپیل دائر کرنے کی ہدایت کی۔

میڈیا سے گفتگو کرتے ہوئے بیرسٹر سلمان صفدر نے بتایا کہ قانونی ٹیم کو ایک رات قبل کیس کی سماعت سے متعلق آگاہ کیا گیا تھا، مگر فیصلہ سنائے جانے کی توقع نہیں تھی۔ ان کے بقول سولہ اکتوبر کو کیس ملتوی کیا گیا تھا اور موجودہ تاریخ صرف دلائل کے لیے مقرر تھی، جبکہ فیصلہ وکلا کی عدم موجودگی میں سنایا گیا۔

وکیل نے مؤقف اختیار کیا کہ 59 صفحات پر مشتمل فیصلہ قانونی تقاضوں کے برعکس پڑھا گیا اور ماضی میں بھی اڈیالہ جیل سے آنے والے فیصلوں پر ہائی کورٹ سے ریلیف ملتا رہا ہے۔ بیرسٹر سلمان صفدر کے مطابق عمران خان نے تمام تر دباؤ کے باوجود حوصلہ برقرار رکھا اور قانونی راستہ اختیار کرنے پر زور دیا، جس کے بعد اپیل دائر کرنے کی تیاری شروع کر دی گئی ہے۔