سمجھ کر عمل بھی کر

کبھی آپ نے کسی انگلش فلم,

تحریر :-
راجہ ارشد محمود ستی روس ماسکو
میں ایسا سین دیکھا ہے جس میں ایکٹر باتھ روم میں ٹوتھ برش کررہا ہے؟ آپ نے نوٹ کیا ہوگا کہ دانتوں میں برش کرتے وقت بیسن کا پانی بند ہوتا ہے جبکہ دانت صاف کرنے کیلئے اس کے پاس ایک چھوٹا سا گلاس رکھا ہوگا جس میں وہ پانی بھر کر کلی کرتا ہے۔

اسی طرح جب کچن میں برتن دھوئے جاتے ہیں تو سنک کا ڈرینج فلو بند کرکے اس میں پانی بھر لیا جاتا ہے، پھر اس پانی میں برتن دھوئے جاتے ہیں۔

یہ پریکٹس تقریباً تمام مغربی ممالک میں یکساں پائی جاتی ہے۔ چاہے کوئی امیر ہو یا غریب، وہ پانی ضائع نہیں کرتا۔ دوسری طرف پاکستان میں جب ہم دانتوں میں برش کررہے ہوتے ہیں تو اس دوران واش بیسن کا نلکا مکمل کھلا ہوتا ہے اور پانی سیدھا نالی میں جارہا ہوتا ہے ۔ ۔ ۔ برتن دھوتے وقت بھی یہی کچھ کیا جاتا ہے، نلکا پورا کھلا ہوتا ہے اور پانی مسلسل نالی میں جارہا ہوتا ہے۔ ۔ ۔ اور تو اور، وضو جیسا اہم ترین رکن ادا کرتے وقت بھی ہم کئی گیلن پانی نالی میں بہا دیتے ہیں۔

چونکہ پاکستان میں عام طور پانی انتہائی ارزاں چیز سمجھی جاتی ہے، اسلئے ہم دل کھول کر اسے ضائع کرتے ہیں، باوجود اس کے کہ ہمارے پاس نہ تو مغربی ممالک جتنے وسائل ہیں اور نہ ہی پانی کے بحران سے نمٹنے کی صلاحیت۔

اس رویئے کی کیا وجوہات ہیں؟ تعلیم کی کمی کو ہم موردالزام نہیں ٹھہرا سکتے کیونکہ یہ رویہ آپ کو ڈاکٹرز، انجینئرز اور ایم اے پاس لوگوں کے ہاں بھی ملے گا۔
دین سے دوری بھی نہیں کہہ سکتے کیونکہ پانی کا ضیاع مساجد میں بھی ایسے ہی ہوتا ہے۔

اسے ہم مجموعی معاشرتی جہالت کہیں یا ضد ، جو ہمیں اپنی سال ہا سال پرانی روش ترک کرنے سے روکے رکھتی ہے۔ ہمیں لگتا ہے کہ ہمیں اپنی کوئی خراب عادت اس لئے نہیں بدلنی چاہیئے کیونکہ دوسروں نے نہیں بدلی۔ سمجھتے تو سب کچھ ہیں لیکن عمل نہیں کرتے اور مشورہ دوسرے کے لیے ہوتا ہے کیونکہ ہم یہ فیصلہ خود ہی کر لیتے ہیں کہ ہمیں سمجھ بوجھ دوسروں سے زیادہ ہے اور لوگ ہماری ہر بات پر عمل کریں۔ ہم فلموں میں کام کرنے والے کو برا کہتے ہیں لیکن ان کی ہی فلم بڑے شوق سے دیکھتے ہیں اسی طرح ہم حرام کھانے والے کو حرامزادہ کہتے ہیں اور ان کے گھر کھانا کھانے والوں کو کچھ نہیں کہتے ہم جسم فروش کو طوائف کہتے ہیں مگر ان کے پاس جانے والے کو کچھ نہیں کہتے ۔ ہم کچرا اٹھانے والے کو چمار اور بھنگی کہتے ہیں لیکن سڑک خود کچرا پھیلا کر خود کو سردار سمجھتے ہیں ہم دین پر مرنے کے لیے سب سے آگے ہوتے ہیں لیکن جب دین کو اپنے اوپر نافذ کرنے میں پیچھے ہوتے ہیں ہم دوسروں پہ تنقید میں آگے آگے اور اپنی اصلاح میں پیچھے ہوتے ہیں۔ رسول اللہ نے فرمایا جو چیز اپنے لیے پسند کر وہی چیز اپنے بھائی کے لیے بھی۔ ہمارا مذہب اسلام ایک مکمل دین حیات کا درس دیتا ہے اس لیے اپنی زندگیوں کو اسلام میں ڈھالیں اگر اپنی فلاح چاہتے ہیں ۔