بجٹ میں دفاع کے لیے وسائل کی فراہمی اولین ترجیح ہے: وزیراعظم شہباز شریف

یوتھ ویژن نیوز : (اسلام آباد) – وزیراعظم شہباز شریف نے قومی اقتصادی کونسل (NEC) کے اجلاس میں گفتگو کرتے ہوئے کہا کہ آئندہ بجٹ میں دفاع کے لیے وسائل کی فراہمی حکومت کی اولین ترجیح ہے۔ انہوں نے واضح کیا کہ دہشت گردی کے چیلنج سے نمٹنے کے لیے اضافی وسائل کی ضرورت ہے۔

اجلاس میں وفاقی وزرا اور تین صوبوں کے وزرائے اعلیٰ نے شرکت کی، جبکہ وزیراعلیٰ پنجاب مریم نواز نے ویڈیو لنک کے ذریعے اجلاس میں شمولیت اختیار کی۔

آئندہ مالی سال کے قومی ترقیاتی بجٹ کی منظوری

NEC کے اجلاس میں آئندہ مالی سال 2026-27 کے قومی ترقیاتی بجٹ کے ساتھ ساتھ وفاق اور صوبوں کے ترقیاتی بجٹ کی بھی منظوری دی گئی۔ رواں مالی سال 2025-26 کے ترقیاتی بجٹ کا تفصیلی جائزہ بھی پیش کیا گیا۔

اجلاس میں صوبوں کے سالانہ ترقیاتی منصوبوں (ADP) پر بریفنگ اور پریزنٹیشنز دی گئیں۔ آئندہ مالی سال کے پبلک سیکٹر انویسٹمنٹ پروگرام (PSIP) کا بھی جائزہ لیا گیا، جبکہ رواں مالی سال کے پبلک سیکٹر انویسٹمنٹ پر بھی غور کیا گیا۔

یکم اپریل 2025 سے 31 مارچ 2026 کی مدت کے دوران مرکزی ترقیاتی ورکنگ پارٹی (CDWP) کی پیش رفت رپورٹ پیش کی گئی۔ اسی عرصے میں اسکیموں کی ایگزیکٹو کمیٹی (ECNEC) اور دیگر متعلقہ فورمز سے منظوریوں کی رپورٹ بھی پیش کی گئی۔

وزیراعظم کے اہم ریمارکس

وزیراعظم شہباز شریف نے کہا کہ مشکلات کے باوجود آئی ایم ایف پروگرام پر عمل پیرا ہونے کی کوشش کی گئی ہے۔ انہوں نے کہا کہ روزگار کے مواقع پیدا کرنا، برآمدات میں اضافہ اور مجموعی معاشی بہتری ہم سب کی مشترکہ ذمہ داری ہے۔

خطے کی صورتحال کے باعث عالمی منڈی میں تیل کی قیمتیں تیزی سے بڑھی ہیں، تاہم حکومت نے عوام کو تیل کی قیمتوں کی مد میں 128 ارب روپے کا ریلیف فراہم کیا۔ دنیا کے کئی ممالک میں پیٹرول پمپوں پر لمبی قطاریں دیکھنے میں آئیں، لیکن بروقت اقدامات کے باعث پاکستان میں پٹرول کی فراہمی برقرار رہی اور عوام کو مشکلات کا سامنا نہیں کرنا پڑا۔ وزیراعظم نے اس سلسلے میں صوبوں کے تعاون کو سراہا۔

دہشت گردی کے چیلنج سے نمٹنے کے لیے اضافی وسائل

انہوں نے کہا کہ پوری قوم، خصوصاً خیبرپختونخوا اور بلوچستان کے عوام، دہشت گردی کے خلاف قربانیاں دے رہے ہیں اور سکیورٹی فورسز کی خدمات قابلِ تحسین ہیں۔ ان کا کہنا تھا کہ دہشت گردی کے ناسور کا متحد ہو کر خاتمہ کرنا ہوگا اور باہمی اتحاد و اتفاق سے ہی اس چیلنج پر قابو پایا جا سکتا ہے۔

وزیراعظم نے بتایا کہ گزشتہ رات ان کی آئی ایم ایف کی منیجنگ ڈائریکٹر سے بات ہوئی، جنہوں نے پاکستان کی معاشی کوششوں کو سراہا۔ مجموعی قومی پیداوار میں اضافے کے لیے معیشت کے مختلف شعبوں کو مراعات دینے کی ضرورت ہے تاکہ ترقی کا عمل تیز کیا جا سکے۔

وزیراعلیٰ پنجاب مریم نواز کی علالت کا ذکر کرتے ہوئے وزیراعظم نے دعا کی کہ اللہ تعالیٰ انہیں جلد صحتِ کاملہ عطا فرمائے۔