کراچی کے نوجوان صالح آصف فوربز ارب پتیوں کی فہرست میں شامل

یوتھ ویژن نیوز : (ویب ڈسک) کراچی سے تعلق رکھنے والے 26 سالہ ٹیکنالوجی ماہر صالح آصف فوربز ارب پتیوں کی فہرست میں شامل ہوگئے ہیں، جس سے عالمی سطح پر پاکستان کا نام روشن ہوا ہے۔

اے آئی اسٹارٹ اپ ’Cursor‘ کی کامیابی

صالح آصف معروف امریکی تعلیمی ادارے MIT سے اپنے ساتھیوں کے ساتھ ‘Cursor’ کے شریک بانی ہیں، جو مصنوعی ذہانت پر مبنی جدید کوڈ ایڈیٹنگ پلیٹ فارم فراہم کرتا ہے۔ یہ کمپنی تیزی سے دنیا کی نمایاں اے آئی اسٹارٹ اپس میں شامل ہوچکی ہے۔

نومبر 2025 میں کمپنی نے 2.3 ارب ڈالر کی بڑی فنڈنگ حاصل کی، جس کے بعد اس کی مجموعی مالیت 29.3 ارب ڈالر تک پہنچ گئی۔ عالمی سرمایہ کار کمپنیوں Accel اور Coatue نے اس سرمایہ کاری کی قیادت کی۔

عالمی ٹیک کمپنیوں میں استعمال

Cursor پلیٹ فارم اس وقت لاکھوں سافٹ ویئر ڈویلپرز استعمال کر رہے ہیں، جبکہ Nvidia، Adobe، Uber اور Shopify سمیت 50 ہزار سے زائد بڑی کمپنیوں میں اسے کوڈنگ کے لیے استعمال کیا جا رہا ہے۔

صالح آصف نے تعلیمی میدان میں بھی نمایاں کارکردگی دکھائی اور 2016 سے 2018 تک انٹرنیشنل میتھمیٹکس اولمپیاڈ میں پاکستان کی نمائندگی کی۔ MIT کے دوران ہی انہوں نے ایک اے آئی سرچ انجن اسٹارٹ اپ بھی شروع کیا تھا۔

سوشل میڈیا پر پذیرائی

سوشل میڈیا پر صارفین نے اس کامیابی کو سراہتے ہوئے صالح آصف کو نوجوانوں کے لیے رول ماڈل قرار دیا ہے۔ ماہرین کے مطابق یہ کامیابی مصنوعی ذہانت کے شعبے میں تیزی سے ابھرتے مواقع کی عکاسی کرتی ہے۔