ڈرائیونگ لائسنس بنوانے والوں کے لیے بڑی خوشخبری

 پنجاب بھر میں ڈرائیونگ لائسنس سینٹرز کے کام کے اوقات کار میں تاریخی توسیع کر دی گئی ہے۔

 یوتھ ویژن نیوز : (محمد عباس سے) پنجاب ٹریفک پولیس کے حکام کے مطابق صوبے کے بڑے شہروں لاہور، راولپنڈی اور ملتان میں یہ مراکز اب 24 گھنٹے تک کھلیں گے، جبکہ چھوٹے شہروں اور قصبوں میں ڈرائیونگ لائسنس کے لیے خدمات کا دورانیہ بڑھا کر صبح 8 بجے سے رات 12 بجے تک کر دیا گیا ہے۔

ٹریفک پولیس کے ترجمان نے ‘یوتھ ویژن‘ کو بتایا کہ "یہ اقدام عوامی سہولت کو مدنظر رکھتے ہوئے اٹھایا گیا ہے۔ نئے اوقات کار سے شہریوں کو اپنی پسند کے وقت پر ڈرائیونگ لائسنس بنوانے، تجدید کروانے یا دیگر متعلقہ خدمات حاصل کرنے میں غیر معمولی آسانی ہوگی۔ اس سے کام کرنے والے افراد کو دفتری اوقات میں چھٹی لینے کی ضرورت بھی کم ہو جائے گی۔”

عوامی ردعمل ابتدا میں ہی مثبت ہے۔ لاہور کے ایک شہری عمران احمد کا کہنا تھا کہ "24 گھنٹے ڈرائیونگ لائسنس سینٹر کھلنے سے ہماری بڑی مشکل حل ہو جائے گی۔ اب ہم رات کے پرسکون اوقات میں بھی اپنے ڈرائیونگ لائسنس کے معاملات نمٹا سکیں گے۔” اسی طرح راولپنڈی کی ایک طالبہ سماء نے اس فیصلے کو نوجوانوں کے لیے خصوصی سہولت قرار دیا۔

حکام کے مطابق اس توسیع کے ساتھ ساتھ آن لائن اپائنٹمنٹ سسٹم کو مزید بہتر بنایا جائے گا اور ڈیجیٹل خدمات میں اضافہ کیا جائے گا، تاکہ عوام کو ایک ہی دورے میں تمام کام نمٹانے کی سہولت مل سکے۔ واضح رہے کہ پنجاب ٹریفک پولیس کی یہ کوشش صوبے میں ٹریفک نظام کو جدید اور عوام دوست بنانے کے وسیع تر منصوبے کا حصہ ہے۔