وفاقی کابینہ نے زرعی بائیو ٹیکنالوجی، بیج، اور مہارت کی ترقی کی قومی پالیسیوں کو منظوری دے دی

اسلام آباد (یوتھ ویژن نیوز) – وزیراعظم شہباز شریف کی زیر صدارت وفاقی کابینہ کے اجلاس میں ملک کی پہلی قومی زرعی بائیوٹیکنالوجی پالیسی، قومی بیج پالیسی، اور نیشنل اسکلز ڈیولپمنٹ پالیسی سمیت متعدد اہم پالیسیوں کو سبز روشنی دکھا دی گئی۔

بیرون ملک جانے والوں کے لیے اہم سہولت

کابینہ اجلاس میں بیرون ملک جانے والے پاکستانی مزدوروں اور پیشہ ور افراد کو عالمی معیار کے مطابق تربیت اور سرٹیفیکیشن فراہم کرنے کے لیے خصوصی اقدامات کی منظوری دی گئی۔ نیشنل اسکلز ڈیولپمنٹ پالیسی کے تحت ملکی افرادی قوت کو جدید صنعتی اور تجارتی تقاضوں سے ہم آہنگ کیا جائے گا۔ اس عمل میں وفاق، صوبوں اور نجی شعبے کا باہمی تعاون شامل ہوگا۔

ویکسین تیاری میں خودکفالت کی جانب قدم

کابینہ نے ملکی سطح پر ویکسین کی تیاری کی پالیسی بھی منظور کی، جس کا مقصد درآمدات میں کمی، زرمبادلہ کی بچت، اور ویکسین میں خودکفیل ہونا ہے۔ ڈریپ (DRAP) کے تحت قیمتوں اور معیار کی نگرانی کے لیے ایک خصوصی کمیٹی تشکیل دی جائے گی۔

زرعی انقلاب کی شروعات

زرعی شعبے میں انقلابی تبدیلی کے لیے نیشنل ایگریکلچر بائیوٹیکنالوجی پالیسی کا مقصد غذائی تحفظ، پیداوار میں نمایاں اضافہ، اور تحقیقی حکمت عملیوں کو فروغ دینا ہے۔ جبکہ نیشنل سیڈ پالیسی 2025 کے تحت 15 سے 20 فیصد تک زرعی پیداوار بڑھانے اور عالمی معیار کی بیج کمپنیوں کے ساتھ شراکت داری کے مواقع پیدا کیے جائیں گے۔

یومیہ اجرت اساتذہ کے لیے خوشخبری

وفاقی کابینہ نے وفاقی تعلیمی نظام میں یومیہ اجرت پر کام کرنے والے گریڈ 1 تا 15 کے اساتذہ کو سپریم کورٹ کے فیصلے کے مطابق ایف ڈی ای وزیٹنگ فیکلٹی ریگولیشنز 2025 کے تحت وزیٹنگ فیکلٹی کے طور پر رکھنے کی منظوری دی۔

دیگر فیصلے اور رپورٹس

اجلاس میں نیپرا کی سالانہ رپورٹ 2025 اور اسٹیٹ آف انڈسٹری رپورٹ 2025 بھی پیش کی گئیں۔ وزیراعظم نے مشرق وسطیٰ میں کشیدگی کم کرنے کے لیے پاکستان کی سفارتی کاوشوں سے کابینہ کو آگاہ کیا اور عالمی پٹرولیم بحران کے باوجود عوام کو ریلیف فراہم کرنے پر اطمینان کا اظہار کیا۔

اجلاس کے دوران وفاقی وزیر برائے تخفیف غربت و سماجی تحفظ عمران احمد شاہ کی والدہ کے انتقال پر فاتحہ خوانی بھی کی گئی۔