ٹی 20 ورلڈ کپ: پاکستان اور بھارت کے میچ پر بارش کے سائے، شائقین میں تشویش

یوتھ ویژن نیوز : (اسپورٹس ڈیسک) دنیا بھر کے کرکٹ شائقین جس لمحے کا شدت سے انتظار کر رہے ہیں، یعنی پاکستان اور بھارت کے درمیان ٹی 20 ورلڈ کپ کا ہائی وولٹیج ٹاکرا، اب اس پر بارش کے سائے منڈلانے لگے ہیں۔ 15 فروری کو کولمبو کے تاریخی آر پریمی داسا اسٹیڈیم میں ہونے والے اس میچ کے حوالے سے موسمیاتی ماہرین نے پریشان کن پیشگوئی کی ہے۔

مزید پڑھیں : ٹی 20 ورلڈ کپ: حکومتِ پاکستان نے قومی ٹیم کو بھارت کے خلاف میچ کھیلنے کی اجازت دے دی

بارش کا کتنا امکان ہے؟ موسمیاتی رپورٹ کے مطابق، کولمبو میں ان دنوں موسم غیر یقینی ہے اور 15 فروری کو میچ کے اوقات کے دوران گرج چمک کے ساتھ بارش کا قوی امکان ہے۔ اگر بارش ہوتی ہے تو نہ صرف ٹاس میں تاخیر ہو سکتی ہے بلکہ میچ کے اوورز بھی کم کیے جا سکتے ہیں، جس سے کھیل کی رفتار اور شائقین کا جوش متاثر ہونے کا خدشہ ہے۔

شائقین کی بے چینی اور دعائیں: پاکستان اور بھارت کے درمیان میچ صرف ایک کھیل نہیں بلکہ اعصاب کی جنگ ہوتی ہے۔ کولمبو کے ہوٹلز پہلے ہی بک ہو چکے ہیں اور ہزاروں شائقین سری لنکا پہنچ چکے ہیں۔ غیر متوقع برساتی موسم کی خبروں نے شائقین کو دعاگو کر دیا ہے کہ بادل برسے بغیر ہی گزر جائیں تاکہ انہیں ایک مکمل اور سنسنی خیز مقابلہ دیکھنے کو ملے۔