او آئی سی وزارتی کانفرنس برائے خواتین: تکنیکی سیشنز جاری، مرکزی وزارتی اجلاس کل ہوگا

یوتھ ویژن نیوز : (اُم َ ہانی سے) او آئی سی وزارتی کانفرنس برائے خواتین: تکنیکی سیشنز جاری، مرکزی وزارتی اجلاس کل ہوگا

اسلام آباد: اسلامی تعاون تنظیم (او آئی سی) کے رکن ممالک کی 9ویں وزارتی کانفرنس برائے خواتین کے تکنیکی سیشنز اسلام آباد میں جاری ہیں، جبکہ مرکزی وزارتی اجلاس کل منعقد ہوگا۔ کانفرنس کے انعقاد کے لیے تمام انتظامات مکمل کر لیے گئے ہیں۔

اس بین الاقوامی کانفرنس میں او آئی سی کے 57 رکن ممالک سے تقریباً 190 مندوبین شرکت کر رہے ہیں، جن میں ممتاز خواتین شخصیات، اعلیٰ سرکاری حکام، او آئی سی کے مبصرین اور دیگر متعلقہ عہدیداران شامل ہیں۔

پاکستان پہلی بار میزبان

او آئی سی خواتین کی وزارتی کانفرنس کا پہلا اجلاس 2006 میں ترکی کے شہر استنبول میں منعقد ہوا تھا۔ اس کے بعد یہ کانفرنس ہر تین سے چار سال کے وقفے سے او آئی سی کے مختلف رکن ممالک میں منعقد ہوتی رہی ہے۔

اس بار اس اہم وزارتی کانفرنس کی میزبانی کا اعزاز پاکستان کو حاصل ہوا ہے، جہاں رکن ممالک کے وزراء خواتین کے حقوق، ترقی اور بااختیار بنانے سے متعلق پیش رفت کا جائزہ لینے کے ساتھ ساتھ اپنی قومی پالیسیوں اور تجربات کا تبادلہ بھی کریں گے۔

خواتین کی ترقی کے لیے مشترکہ حکمت عملی

کانفرنس کا بنیادی مقصد او آئی سی کے رکن ممالک میں خواتین کے لیے ایسا سازگار ماحول پیدا کرنے کے لیے مشترکہ حکمت عملی وضع کرنا ہے، جس سے وہ اپنی صلاحیتوں کو بروئے کار لاتے ہوئے سماجی اور معاشی ترقی میں مؤثر کردار ادا کر سکیں۔

اجلاس کے دوران خواتین کی سیاسی اور پیشہ ورانہ شعبوں میں شرکت بڑھانے، معاشی وسائل اور مالیاتی نظام تک بہتر رسائی فراہم کرنے اور ٹیکنالوجی و ڈیجیٹل شعبوں میں صنفی تفاوت کم کرنے کے مختلف طریقوں پر بھی غور کیا جائے گا۔

باہمی تعاون کے فروغ پر تبادلہ خیال

کانفرنس میں شریک رکن ممالک کے سرکاری نمائندے خواتین کے حقوق کے فروغ، انہیں بااختیار بنانے اور جامع و پائیدار ترقی کے لیے باہمی تعاون کو مزید مضبوط بنانے سے متعلق مختلف تجاویز اور آئندہ کے مشترکہ لائحہ عمل پر بھی تبادلہ خیال کریں گے۔