ماہِ مقدس کی تیاریاں: لودھراں میں ‘استقبالِ رمضان’ پروگرام کا انعقاد، ایڈیشنل چیف سیکرٹری جنوبی پنجاب اور حامد سعید کاظمی کی شرکت
یوتھ ویژن نیوز: (طاہر ایوب خان سے) وزیراعلیٰ پنجاب مریم نواز شریف کے "استقبالِ رمضان” ویژن کے تحت ضلعی انتظامیہ لودھراں کے زیراہتمام ایک پروقار تقریب کا انعقاد کیا گیا۔ میری بینکوئیٹ مارکی میں منعقدہ اس پروگرام میں سرکاری افسران، تاجروں، طلباء، صحافی برادری اور امن کمیٹی کے ارکان سمیت شہریوں کی بڑی تعداد نے شرکت کی۔
سرکاری افسران اور معززین کا خطاب: پروگرام کے مہمانِ خصوصی ایڈیشنل چیف سیکرٹری جنوبی پنجاب فواد ہاشم ربانی تھے۔ انہوں نے اپنے خطاب میں کہا کہ رمضان زندگیوں میں تبدیلی کا مہینہ ہے اور بطور سرکاری ملازم ہمیں اپنے رویوں میں نرمی اور دوسروں کے لیے آسانیاں پیدا کرنی چاہئیں۔ ڈپٹی کمشنر محمد اشرف نے ماہِ صیام کو حیاتِ انسانی کے فلسفے پر عمل کا مہینہ قرار دیتے ہوئے نیکیوں کے اجر میں اضافے کا تذکرہ کیا۔
مزید پڑھیں : عوامی مسائل اور ترقیاتی منصوبے: ڈی سی لودھراں کا کہروڑ پکا کے مختلف علاقوں کا دورہ
سید حامد سعید کاظمی کا روحانی درس: ممتاز عالمِ دین سید حامد سعید کاظمی نے شرکاء سے خطاب کرتے ہوئے روزے کے اصل مقصد پر روشنی ڈالی۔ انہوں نے کہا کہ نفس کی پیروی سے اجتناب ہی روزے کا اصل مفہوم ہے اور برائیوں سے رک جانا ہی اس کا اصل فلسفہ ہے۔ انہوں نے زور دیا کہ رمضان میں انفرادی عبادت کے ساتھ ساتھ اجتماعی شعور کی بیداری بھی ضروری ہے۔ ان کا کہنا تھا کہ خواہشات کی پیروی انسان کو دین سے دور کر دیتی ہے، لہٰذا ہمیں اپنی اصلاح کا کام خود شروع کرنا ہوگا۔
اختتامی دعا: پروگرام کے اختتام پر ملکی سالمیت، استحکام اور نیکیوں میں سبقت کے لیے خصوصی اجتماعی دعا کی گئی۔ ڈی پی او علی بن طارق، اے ڈی سی جی لیاقت علی گیلانی اور دیگر اسسٹنٹ کمشنرز بھی اس موقع پر موجود تھے۔ شرکاء نے لودھراں انتظامیہ کی اس کاوش کو سراہتے ہوئے اسے ماہِ صیام کی روح کو سمجھنے کے لیے ایک بہترین پلیٹ فارم قرار دیا۔
