عوامی مسائل اور ترقیاتی منصوبے: ڈی سی لودھراں کا کہروڑ پکا کے مختلف علاقوں کا دورہ
یوتھ ویژن نیوز : (طاہرایوب خان سے) ڈپٹی کمشنر لودھراں محمد اشرف نے عوامی فلاح و بہبود کے مشن کے تحت تحصیل کہروڑپکا کے علاقے مسہ کوٹھہ کا مفصل دورہ کیا۔ اس موقع پر انہوں نے نکاسی آب، تعلیم اور صحت کے شعبوں میں جاری سرگرمیوں کا باریک بینی سے جائزہ لیا۔ دورے کے دوران اسسٹنٹ کمشنر اصغر اقبال لغاری اور سی او ضلع کونسل سید مصلح الدین بھی ان کے ہمراہ تھے۔
نکاسی آب اور انتظامی اقدامات: ڈپٹی کمشنر نے علاقے میں سیوریج کی بند لائنوں کا نوٹس لیتے ہوئے مشینری کی ورکنگ کا معائنہ کیا اور فوری طور پر "ڈی سلٹنگ” (صفائی) کے احکامات جاری کیے۔ انہوں نے پبلک ہیلتھ سکیم میں حائل رکاوٹوں کو دور کرنے کے لیے یوزر کمیٹیوں کو فعال کرنے اور سیوریج جوائنٹس کے نئے تخمینے لگانے کی ہدایت کی۔ محمد اشرف نے دوٹوک الفاظ میں کہا کہ "تجاوزات کا خاتمہ یقینی بنایا جائے گا اور دکاندار اپنا سامان حدود کے اندر رکھیں تاکہ عوامی نقل و حرکت میں رکاوٹ نہ آئے۔”
مزید پڑھیں : ڈپٹی کمشنر لودھراں کی ’اوپن ڈور پالیسی‘ کے تحت سائلین سے ملاقات
تعلیم اور صحت پر توجہ: دورے کے دوران ڈپٹی کمشنر نے گورنمنٹ ہائی اسکول کا معائنہ کیا، جہاں انہوں نے اساتذہ کو تدریسی معیار اور صفائی ستھرائی مزید بہتر بنانے کی تاکید کی۔ بعد ازاں انہوں نے "مریم نواز ہیلتھ کلینک” مسہ کوٹھہ کا دورہ کیا اور مریضوں کو فراہم کی جانے والی طبی سہولیات پر اطمینان کا اظہار کرتے ہوئے کلینک کی تزئین و آرائش کے کام کی دیکھ بھال کی ہدایت کی۔
عوامی عزم: اہلِ علاقہ سے گفتگو کرتے ہوئے محمد اشرف کا کہنا تھا کہ "ہمیں لوگوں کی مشکلات کا بخوبی احساس ہے، اپنے وسائل کے اندر رہتے ہوئے ہر ممکن ریلیف فراہم کریں گے۔” انہوں نے واضح کیا کہ تعلیمی اداروں اور طبی مراکز کی ضروریات کو پورا کرنا ضلعی انتظامیہ کی اولین ترجیح ہے۔
