دلہن کے گاؤں پہنچتے ہی دولہا گاڑی سے اتر کر بھاگ گیا، باراتی انڈر گراونڈ

بھارتی ریاست اُتر پردیش کے رام پور ضلع میں دولہا کو اچانک کار سے نکل کر بھاگتے دیکھ کر ہنگامہ مچ گیا۔
دراصل رام پور میں لڑکی والے بارات کا انتظار کررہے تھے، مگر راستے میں ہی دولہا، باروتیوں سمیت غائب ہوگیا۔
جب معلوم کیا گیا تو پتہ چلا کہ راستے میں دولہے کی گاڑی حادثے کا شکار ہوگئی ہے اور اس کی کار سے ایک معصوم کی جان چلی گئی ہے۔
اس کے بعد دلہن کے گھر میں افراتفری پیدا ہوگئی۔
دراصل یہ واقعہ بدھ کی دوپہر تحصیل علاقہ کے گاوں رسول پور فرید پور میں پیش آیا، جہاں اسرار سلمانی نامی شخص کی بیٹی کی بارات تحصیل علاقہ کے گاوں جالف نگلا سے آئی تھی۔
جیسے ہی دولہے کی کار گاوں میں داخل ہوئی، تبھی اس کی زد میں سڑک پار کرتے وقت ایک پانچ سالہ بچہ آگیا اور اس کی جائے واقعہ پر ہی موت ہوگئی۔
اس واقعہ کے بعد دولہا فوراً گاڑی سے اتر کر فرار ہوگیا اور ایک گھر میں جاکر چھپ گیا۔ اس نظارے کو دیکھ کر باراتی بھی فوراً گاڑیوں سے اتر کر اِدھر اُدھر چھپ گئے۔
گاوں والوں نے کافی دیر تک تلاش کیا تب جا کر روپوش ہوئی بارات باہر آئی۔ اس واقعے کے فوراً بعد پولیس جائے وقوعہ پر پہنچی اور لاش کو اپنے قبضہ میں لے کر پوسٹ مارٹم کے لیے بھیج دیا۔
ادھر دلہن والے بارات کا انتظار کررہے تھے، کیونکہ وقت کافی زیادہ ہوگیا تھا۔ جیسے ہی لڑکی کے گاوں والوں کو اس کی اطلاع ملی تو فوراً جائے وقوعہ پر پہنچ کر سمجھوتہ کرانے کی کوشش کی۔
پولیس نے قانونی کارروائی پوری کی اور آپسی اتفاق رائے سے دونوں فریقوں کے درمیان سمجھوتہ ہوگیا۔ اس کے بعد نکاح کی رسم شروع ہوئی۔
حالانکہ کچھ وقت تک لڑکی کے دروازے پر ماتم والا ماحول ہوگیا تھا اور کھانے پینا بھی روک دیا گیا تھا۔